Da u: Shimphang Lyngdoh, Lumputhoi
Aa pha ka pli ka Bei Rymaw!
Katwon ya pha wa yoo diaw,
Kjut i mynsien hawa pait O ki;
Yei doh yong pha nangran nangsti.
Na ki loom da kylla chei madan,
Neidaw u bru wa khih wa khan;
Ki snam yong pha la waroh da kjit,
Ki liar ki chka da jngud da tngit.
Da ki hajar tre chi snem ki dieñ da daiñ,
Hapoh ka ri manha ki thaaiñ;
Yoh u chna yung chna kot chna sla,
Wa ki kaam boonjait wow pynmih poisa.
Ki karkhana wa kut jait kut skær,
Su i tdem cha suiñ na khyndaw wa hær;
Ka la’er wa khooid kattu da kylla bih,
Na ri sepsngi Oxygen u ya dih.
Ki ranem ki phlang wa ki dieñ ki seij,
Ya ki khmat u bru wa pynchoh biej;
Na jngai cha jngai da thliang wow pait.
Ki dieñkseh dieñkhloo la waroh da mait.
Ki mrad khloo wa ki sim ki doh,
Thaw chong thaw sah da dooh waroh;
Da wiar jait lut waroh kiwa da thaw,
Ka mynried yong u bru sah su’i khyndaw.
Kor ka spah næ i im?
Ka rai wa khaddooh ya nga ya phi wow chim;
Ya ka spah u yoh kylleiñ hap thooh,
La’er riñ mynsien chi Second wym hoi u dooh.
