Da u Chandame Sungoh
Aa ka kam nga u khon lymboit lymbiang,
U khon wa dooh wa duk, u kup u sem chiliang;
Kat chawa mut wa thmu, wym em i wa pai phang,
Kut ki du hei sahteiñ, wym em iwa lait liang.
Hei dooh te paya, wym em dor ki kaam wa bha,
Da jop ka pap manda klam bru ka poisa;
Na yung na sem da chah beiñ chah tim chwa,
Ha khmat pyrthai pathan yi hi wa pait wa bna.
Thirjat dei sula jæd, wei slipar pai khyndong,
Man-ka-sngi khih yap, la ngiah wym yoh u chong!
Waroh chi tayaw u khih hawa dor wow tympong,
Kattæ leh manda poi ka sngi choh-that dang chah ah nong.
Aa, i bhah i nasib ya i kiwa mylla!
Wym em wa wyrai, wym em wa rap wa bna;
Nalor i khih chitom, sa ka nong wa duna,
Na ini i daw se wym hoi bru chi rata!
Hawa lai cha yaw cha haat, ong ki bru, “Kam ka tai”,
Yi hi wa ong, “Aa u pli yoo wyrai”;
Katni te kamtæ se wa yah ka pyrthai,
Hawa pat uwa dooh, yi warap wa pynkhai!
Hei rata pyrthai sngi, Aa i im wa chem pap,
U Blai leh ya i tæ yoo la kam wa arsap!
Manda chongtre i dooh katwa khih leh wym dap,
Kamni bait hei jynjar nawa kha hawa yap.
