Da u: Chandame Sungoh, Chutwakhu, Jowai
Aa, khon khliehnood ka bei u pa,
Pynsarot yame i synjre lana;
Lana lahon pynbiang pyntoh,
Pathan poi mi chei ngait pynroh.
Phah pynlai skur yame cha sor,
Yow yoh yei stat burom akor;
Han leh khlem akor mi waki lok,
Dih biri sikret, dih kiad, dih drugs.
Wei kheiñ mahajon wei leh lutphut,
Du ki chan mi tip katwon ngut,
Man ka janmiet chibet da kawi,
Yah lai dih beer lai dih coffee.
Paan poisa mi tyndon tyndon,
Ong mi ka bai thoh test bai tution,
Hanpaya cha class tæ wym jooh poi,
Man-ka-sngi du ka lai enjoy.
Yei miat yei bha wymtip mi u pyrkhat,
Man la u snem du hei sah class,
Aa, kat yei leh ngait yei kaam sñiawbha,
Thied mi dei khih chitom ka bei u pa!.
Me man mi kam u khon phrang sngi,
Yaki diah mi wow yah luti,
Han kat u yoo tæ mar deiwi,
Nuksa wasih pynyoo mi ki.
Man mi u sanpun ka yung ka sem,
Ki pyrsa ki ksu mi dang u em,
Me sæ wow sneiñ wow kroo yaki,
Man mi u ma, u woh næ u kñi.
Han kaini i long mi tæ cheiwon!
Waroh itæ sep-ai synnæ khon,
Plæh u moina ka yung ka sem,
Ka bei wow pa mi leh yaamrem.
Dang khian mi ya leh u lana lahon,
Yah rwai yah kyrkhu O, oi oi khon
Khut maya O me dei pa dei syiem,
Han mynda heh mi tea yoh dei chah tim!
Yei sneiñ yei kroo yei pynyoo pynkdaw,
Thlah hawa yoo khlot hawa sñiaw;
Manda sneiñ da kroo yei miat yei bha,
Wym ye chah mi, wei pynheh ñia.
Kaam yung kaam sem, kaam kur kaam jait,
Wym jooh bna mi u yoo u pait,
Da lut ki sngi da lut i por,
Du hei kaam awria wa ha u bilor.
Cha ki kaam yong ka imlang sahlang,
Cha kitæ pathan ymboi kyrmang
Da im mi du wa ki bru khlem kaam,
Sadu hei dih sadu hei baam.
Kylla wamut noh synnæ khon,
Kamni bait u im mi tæ kammon!
Yei rta pyrthai mi ham pyn sep-ai,
Kylla wamut, kyr-uiñ cha u Blai.
