Da: U Shimphang Lyngdoh, Lumputhoi, EJHD
I por wada toh u pynlum pynlang,
Maad pathan ki pli dei sñiawsih kthang;
Na ka pyrthai myndær wym maap de,
Da baam dooh ko kattu wot ya u symbe.
Waroh chisnem wada sumaar sukhær,
Syndet da tyngkheiñ da sympat ka la’er;
I thrang wa i angnood da dooh lut ki pli,
Sep-ai waroh chisnem wada lut por lut sngi.
U kba u khoo wa ki jhoor ki jhep,
Ha uni chooh u snem kattu tæ da sep;
Tyrseiñ i doh i pran por wa khih wa kreh,
Ki soh da haap da tlor na ka la’er wa beh.
Dang em thaw hi ma-ai ya ki pli ki warep?
Ki laad yarap yoh u kyllep u sdep;
Khamtam na ka bei sorkar watoh u pait,
Lada toh kiwa thngan to ham ieh syngngeit.
Lada em i sñiaw wyrai wow pynchlur ya ki,
Ham hun u pait du ki khmat donhi;
I dooh mynsien wa i sñiawsih kthang,
Tang u baam u dih wym em de sñiawbang.
Chakæ ka pyrthai ya ki pli ki warep,
Khia i pyrkhat pyrdaiñ la kam choh tyndep;
Ki bainong watoh u yoh tip neiwon u lithooh?
Lada em kiwa smat u yarap katwon i sñiawngooh.
Ha kawa khaddooh hap khmied hi cha u Blai,
Boi na lyndet dang bien u wow yoo wyrai;
Da kiwi tawon ki laad wow kyrkhu kyrdoh,
Ya ka bai-seiñ bai-dang yow ye u yoh.
