Shillong: I em ki thaw wa yoosuk ha ri loom Khasi Jaiñtia da riñ ki ya kiwa uiñke pyrthai wow wan pait ya kini ki spah ka rymaw wei kawi na ki thaw wa yoosuk toh ka chnong Shiliang Jashar kawa man ka chnong kawa yoosuk yoopynngaad.
Kani ka chnong haap ko ha ka thaaiñ Riwar Pynursla wei jngai ko du kamwa 13 kilometer na ka chnong Pynursla, East Khasi Hills District, wei ympu em yoh ko kiwon kiwon ki laad yarap na ka sorkar khamtam wow pynman ya ka kam ka thaw uiñke suwari tangwa ka chnong ryngkat wa ka Shiliang Jashar Eco Tourism Co-operative Society (SJETCS) da pyrchang ki boon ki laad wow pynneh pynsah ya i iwa em iwa ye u riñ ya kiwa wan uiñke suwari.
U Rangbah Shnong uwa man leh u dkhot ka SJETCS, u Seibor Khongthah da pynsñiaw u wa lada ka sarok bha ko, khlem pep kani ka chnong daw riñ ko ya kiwa uiñke suwari na kylleiñ.
Hapoh i yahluti ki dkhot ka Society da sakhi ya ki thaw wa pynchohbiej ya kiwa boon wa em hapoh ka chnong neidaw wa em ka yingkieñ jri ya kawa da pynpoor ha u musiang bah wow pynman luti wow lai bri wei jrong ko hadooh kamwa 22 meter.
Hajan kani ka thaw em ka kchaaid kam ka kchaaid Wah Lynde kawa noh kawa ye u yoo na War Likong View Point.
Kiwi tawon ki thaw wa e ka rymaw toh ka kchaaid Ur Kyrming wa em leh u Maw Puri ha khlieh yong kani ka kchaaid.
I em ka yingkieñ siej kawa em ha ka Wah Jashar kawa em leh ka thwai bah, kani ka yingkieñ pynyabi ko wa ka chnong Nohwet wow pynsuk ya kiwa chong chnong hei lai yaaw lai hat.
Kini ki thaw jngai ki du kamwa chiteiñ kynta na ka chnong wei ym em ki chithaw donhi wei kær ki talawiar ya ka chnong.
Neiliang kiwa kitkaam chnong wa kynthup ya u Pyrmit Khongtiang, u Esting Khongmawloh da ong ki wa hapoh ka chnong em du 168 tylli ki manyung wei kamwa 850 tam kiwa chong chnong kiwa angnood wow tipmit noh ya ka kam kawi na ki thaw uiñke suwari.
Da kyntu ki ya ka sorkar lyngba ka tnat Tourism wow kyruiñ ko cha kani ka thaaiñ neibynta wow pynku ya ka kaam uiñke suwari ha ka thaaiñ wa ka jylla waroh kawi.
Iwa khroo wei iwa emkaam jhan dooh toh wow em ki paikhana paidbah, ki luti kiwa bha wa kiwi kiwi kamwa man kiwi ki thaaiñ ka jylla.
Discussion about this post