Kiwa yahkhmat ka skur Presbyterian Shilliang Myntang Secondary School kawa da seiñ ha u snem 1987, haka yalang pynman Fete yong ka ynne ka sngi neibynta u pynmih poisa yei emkaam ka skur wa kynthup nadoph i su tulop ya kiwa sikai, da pynsñiaw ki ye angnood u yoh noh i yarap naka sorkar khnang yow ye u pyntyllung rap bha rap miat yei tip i stat haka chnong ka thaaiñ.
Haka yalang wada emlang u Montri ka chnat PHE ka sorkar jylla u Renikton Lyngdoh Tongkhar, u MLA ka thaaiñ u Nujorki Sungoh, u MDC ka thaaiñ u R. Tang najrong kiwi won ki sahep sorkar; hawa pynsñiaw yei lai luti ka skur, u Dr. H. Talang da kyntu joor u ya kiwa mihkhmat wa emlang ha kani ka sngi wow pynyoh yarap ya kani ka skur kawa man ka mynried ki khynnah, lada toh daka RMSA lane ka Adhoc Grant.
U Nujorki Sungoh kam u MLA ong u wa hei lai luti yong oo kam uwa mihkhmat, boon ki kaam da pyrchang u leh u yaki chnong ki thaw wei neijrong wa dang boon leh kiwa sahteiñ, kamtæ yooluti u lada dang wai ka laad daw pyndep lut u yeiwa sahteiñ wei kamjooh dang boon iwa daw sdang.
Neiliang u kongsan u Renikton Lyngdoh Tongkhar hawa klam ong u wa neiliang ka sorkar daw pait bniah ko weiwa waroh ki skur balang haka jylla u yoh yarap ki naka sorkar, khlem i pait chiliang khmat, deiwa ong leh wa boonsien hi ki skur balang man kiwa lehbha wei yoo jngai yei tip i stat.
Hawa kyntu won u yaki khynnah skur wow minot ki hei puræ puthi, pynchlur u wow em ki ka thong hei im yong ki, neibhah napyrdi yong ki daw mih kiwa stat wa chemphang wa ye u man nadooh kiwa synchaar haka chnong ka thaw waka jylla kamjooh haki bynta waphær waphær, deiwa e nongmuna ya idæ wa yei kyrdan wa ksoh u katni da yimphoo u nadooh i por wa dang lai Class 8 u.
