Heiyatoh wa i lehkmen ya ka Diwali hapoh ka West Jaiñtia Hills District ha kani ka 12 tarik, neiliang u District Magistrate da pynmih u ya ki kyndon yow lait u tngit u jakhlia ka la-ær, ki luti syngkieñ kamjooh yow lait u chah ktah nei ood wei sawa wa mih nei thang bomkala wa boon jait deiwa booh leh dei por wow thang bomkala.
Da ong u leh wa katkam ka hukum wa pynmih da ka NGT ha ka 09-11-2020 da kdaw wa i thang bomkala kynroi bha ko ya ka la-ær kamtæ da emkaam wow booh kyndon hawa thang bomkala.
Hajrong ini da pynkrehkaam ya ka Section 144 Cr.PC yow khang yei dai wei wow thied ya ki bomkala wa wanrah na baar ri, i pyndait lang ya ki bomkala deiwa ter næ (Series Crackers) iwa pynood bha yei sawa wa i thai ki bomkala kamjooh kiwa pyntngit bha yei chnong i thaw.
Da khang leh wow pynemkaam ya ki bomkala wa ye u ood palat 125DB (A1) næ 145 dB (C) pk hawa em 4 meter nei thaw wa pynpdung.
Da khang wow thang bomkala 100 meter na ki thaw wa em Hospital, Nursing Home, Primary wa District Health Care Centres, ki thaw puræ, ki yung bichaar, ki thaw mane wa kiwi de ki thaw wa da pynbna kam ki Silent Zone da ki bor sorkar.
Chooh chooh da pyntip wa i thang bomkala u chah nadooh 08:00 waje i miet hadooh 10:00 waje i miet.
Da pyntip leh wa i dai bomkala toh du da kitu kiwa da yoh License wei toh u dai du ki jait bomkala wa da chah donhi kiwa bood ya ki kyndon ka Central Pollution Control Board.
Ha ki thaw wa em ki karkhana ymtoh u ood ki bomkala palat ya 75 dB(A) heipor sngi wei ymtoh palat i ya 70 dB(A) heipor miet.
Ha ki thaw wa em ki yaaw ki haat, ki bomkala wa thang ymtoh u ood i palat 65 dB(A) heipor sngi wei ymtoh u ood palat 55 dB(A) heipor miet.
Ha ki thaw wa chong wa sah ki bru ymtoh u ood i boomkala palat 55 dB(A) heipor sngi wei ymtoh u ood palat 45 db(A) hei miet.
Ha ki thaw wa da pynbna kam ki Silent Zone ymtoh u ood i boomkala palat 50 dB(A) heipor sngi wei ymtoh u ood palat 40 dB(A) heipor miet.
Kani ka hukum toh kawa krehkaam chisyndon wei u neh ko hadooh wa kut ka lehkmen Diwali.
Discussion about this post