Ki kur ki kha yong u Pa’im Kawangbor Syiemïong, Syiem ka Hima Nobosohphoh wa kynthup ya ka yung ka sem wa ki payu para yong uni u Syiem da pynsñiaw ki yei sñiawkhia wa joor hadien wa ki bru kiwa kah yei dur khmat da lai wan jngieh wan paitsiar ki ya ka yung wa sah u hadooh ar sien.
Da pyntip ki wa ini da jia i nyngkong ha ka 26 tarik u Naisaphra heiwa ki ar ngut ki bru wa kah yei dur khmat wei kiwa kieñ suloi da wan ki wow yieñ hajan yung u Syiem wei ha ka 3 tarik uni u bnai won da wan biang ki bru kiwa kah dur khmat hajan yung u Syiem heiwa da suba leh wa ye ki wow man ki jooh ki bru kiwa da wan biang wow leh yei jooh.
Katkam wa khana kiwa ha-yung ha-sem, ha ka 3 tarik da jia heipor kamwa 5:00 waje i janmiet, heiwa ha katai sngi uwi u khynroo ka chnong da yoo u ya kitai ki bru tangwa ym nood u wow pyrchang wow booddien neidaw wa em u samen wei kitai ki bru da yut noh ki chapoh khloo.
Kamtæ hawa yatoh wa ini wa da jia la ar sien, neiliang ki kur ki kha da hap ki wow chong yalang kyrpang yow ya pyrkhat sani wei wow ya phyllu heiwa da pynkut leh da ka rai wow khut ya kitæ ki bru wym ye u tipmit wow wan ki chakhmat wow yaklam ha ka miej wa ki, wei lada ym ye de ki u ya sñiawthooh yumut wa u Syiem, neiliang ka yung da ong ko wa smat ko wow chim yei kitkhlieh wow yaklam sñiawthooh neibynta u Syiem tangwa wow wan pyntieñ pynsmiej da pynchitom mynsien ko ya waroh lang, da ong u S. Nongdkhar uwa e ktien ya ka yung hei ya emlang u S. Syiemïong, u payu u Pa’im Nobosohphoh, u P. Nongdkhar, u kong u Pa’im wa kiwi kiwi, wei da pynman ya katai ka yalang ha ka chnong Nongkhlaw, West Khasi Hills District.
Heiyatoh wa ini wa da jia la arsien, u Pa’im da lai u leh wow booh FIR ha Nongstoiñ Police Station.
Discussion about this post