Khliehriat: Ki dkhot yong ka Meghalaya People United Front (MPUF) Khliehriat Circle hei yahkhmat yong u Kyrshan Blah uwa man leh u President yong ka Khliehriat Circle hei emlang ki dkhot yong ka. Hadien wa pyntip kiwa chong chnong yong ka Ladrymbai wa la ar snem kattu chong ki hei doom khlem i bordiñ deiwa ong leh wa ka MeECL dadep booh ko ya u Meter ha ki kattu katni tylli ki manyung yong ka chnong Ladrymbai tangwa iwa sñiawsih won wow ong wa ka chnat MeECL hadien wada dep booh ya u Meter, i bordiñ won ym yoh ki wow pynemkaam la ar snem heiwa i pynpoi bordiñ toh neibynta yong ki manyung wa dooh kiwa em hapoh ka Below Poverty Line (BPL).
Ynne ka sngi u Blah da lai sylli u da ki khmat yong oo ya katai ka chnong wei da chem sakhiat u yei chah ieh beiñ da ka chnat MeECL ya kitai ki manyung yong ka chnong Lad Rymbai. Hawa klam wa kiwa thoh khubor da kylli u yaka MeECL wa neiyi i daw wym pynyoh ya i bordiñ hajrong wada booh ko ya u Meter haki manyung la ar snem kattu.
Chooh chooh da booh u ya i kyntu yaka chnat MeECL wow chimkhia smat ko ya katai ka kaam wow pynyoh bordiñ ya kitai ki manyung hawa da dep wow booh ya u Meter wei ym toh leh wow pait chilliang khmat lada toh hei thaw sor næ thaw palatsor deiwa kreh i jooh.
Da ong u leh ka seiñ daw booddien ko yeini i kaam lada ka MeECL ym chimkhia ko wow pynyoh bordiñ ya kitai ki manyung ha kini ka kajiak sngi wow wan, wei ka seiñ daw lai yachem ko chadooh Shillong ya u James K Sangma uwa man leh u montri ka chnat bordiñ neidaw wa kitai ki manyung da sah ki hei doom la ar snem kattu khlem da yoh u thang yaka bordiñ wa toh u yoh ki.
