Hadien wa ka sorkar ha ka 13 tarik uni u bnai da pynmih ko ya ki kyndon (SOP) heiyatoh wow wai biang ya ki thaw mane Blai hapoh ka jylla deiwa chah du ya kiwa em 18 snem chaneiñ katwa kiwa em 65 snem chaneiñ, kiwa da em chwa yei chitom wa kiwa punkhon toh u neh ki ha yung, tangwa lada kini toh kiwa da dep yoh yei tika pyn-ar sien ye ki wow lai cha ki yungmane. Ki Pastor, ki Father wa kiwi kiwa yahkhmat wa kiwa pynlai niam ye ki wow e yei sneiñ kammon wow leh.
Neiliang ka sorkar da ong ko leh wa da chem wa i tika ye i wow yada nei chah ktah joor ha u khñiang khlam kamtæ lada ye, waroh kiwa lai cha yungmane toh u yoh tika ki ym duna chisien.
Hajrong kini, u DC ka North Garo Hills da pynmih hukum u wow chah u wai ya ki thaw mane Blai, ki thaw leh niam du ha ka sngi Saturday wa Sunday deiwa bood thij ya ki kyndon yada.
Hap wow yajngai uwi ya uwi da 5 phut hapoh ki yungmane, u deiñ ya ki N-95 Mask lane kiwa ar rtap yow yoh bha yei yada.
Hap leh wow booh ya ki thaw sait-kti lane da ki Hand Sanitizer wei ym toh leh wow mynthu ha ki thaw yungmane.
Ha waroh ki thaw mane Blai ym toh u em ki bru palat 1/3 na iwa hoi u em ki bru wei toh u pynbait ya i rukom chong heitæ i rukom wow yajngai 5 phut uwi na uwi.
Lada em i bia, toh u chah bru du 1/3 na iwa hoi u em lane 50 ngut deiwa jied iwon wa duna dooh.
Ki kaam wa yatoh wa i bia kiwa pynman cha baar ki yungmane kam ha ki Hall, u chah wow em du 20 ngut donhi ki bru. Ym chah wow pynman ya ki khawai bia. Emkaam leh wow yoh bor na u DC chwa wow pynman ya i bia.
Ki yungmane u chah u wai ki nadooh 9:00 waje i step hadooh 3:00 waje noh chariñ ka sngi.
