Neidaw wa em ka Cyclonic Storm wa tip kam ka Sitrang ha ka Bay of Bengal kawa da ku cheiliang ka thaaiñ North East ha kini ki 6 kynta wei da neh i ku ko hadooh 5:30 ynne i step ka 24 tarik ha ki bynta Westcentral wa Northwest ka Bay of Bengal iwa jngai 810 km na North-Northwest ka Port Blair, 430 Km na Sagar Island wa 580 km na South-Southwest ka Barisal (Bangladesh).
Kamtæ ka India Meteorological Department (IMD) da pyntip ko wa kani ka Sitrang ye ko wow lai chooh chooh cheiliang North Northeast deiwa lai luti na Bangladesh lyngna la Tinaka Island wa Sandwip hajan ka Barisal hadooh i step ka 25 tarik uni u bnai.
Ini daw wanrah ko ya u slap ha Meghalaya uwa joor hadooh uwa joor bha khamtam ha ki bynta mihsngi ka jylla wa kynthup ya ka Ri-loom Jaiñtia wa Khasi myntu ka 24 tarik.
U slap daw pteiñ u ha ka 25 tarik wei daw joor u ha ki kattu katni ki thaw ka thaaiñ mihsngi (Khasi-Jaiñtia Hills) ka jylla heiwa daw poi u leh cha Garo Hills.
Ye leh wow em ka la-ær wa joor hadooh 30-40 kmph wa hadooh 50 kmph ha ki thaaiñ mihsngi ka Meghalaya.
U slap daw sdang u wow duna ha ka 26 tarik.
Neiliang u DC ka East Jaiñtia Hills da kyntu u ya ki paidbah wow man kiwa syndong wei lada emkaam yarap ki na ki bor District ye ki wow lai cha ki Gram Sevak, cha ki Police Station lane wow pyntip lyngba ka Facebook heiwa da booh leh ya ki Number wa ye u Phone ha u 08798552755.
