Shillong: Ka Bharatiya Janata Party (BJP) Meghalaya State Unit da pynman ko ya ka yachem wa ar sngi neibynta wow pyrkhat heiyatoh wa ki kyrtong wow yakhun Election MDC cha Khasi Hills Autonomous District Council (KHADC) wa Jaiñtia Hills Autonomous District Council (JHADC) ka wow man ha ka 27-02-19.
Hawa yoh wow yaklam wa u General Secretary ka BJP Meghalaya, u Bashailang Khongwir ynnin ka sngi da pyntip u wa i yachem yong ka Party man ko neibynta wow pynyeiñ kyrtong ha ka MDC Election cha ki ar tylli ki District Council.
“Ka yachem i man ko ar sngi hajrong ka Election MDC ha kani ka jylla, yow rai ya ki kyrtong neibynta kani ka Election,” da ong u.
Kam wow pynkynmoo wa boon ki seiñ saiñ pyrthai ha ka jylla da lai ki cha khmat wow pynkhreh ya ka Election MDC, tangwa hawa yaklam wa u Alexander Laloo Hek da ong u wa kani ka kaam chong ko ha kiwa yahkhmat ka Party kiwa pynsñiaw leh wa toh u yakhun bait ha kani ka Election.
“Ka BJP toh u pynyeiñ kyrtong ko ha waroh ki Constituency, nga sñiaw oo wa u President ka Party oo rap tip bha u kammon wow leh hajrong kani ka kaam neibhah nga kam u Montri ha ka sorkar nga ym ye oo u tuklar palat,” ong u Hek.
Hadooh katni ka BJP ym pu em pynbna ko uwi leh u kyrtong MDC katwa kiwi ki party da dep ki wow pynbna la ar sien le sien.
“Ki kyrtong kiwa pynbna hadooh katni toh ha lær, u sñiawthooh che du ha ka sngi wa thap pyrtuid kiyi wow leh sakhiat ha kani ka Election,” da ong u.
Heiyatoh waka Election MP ka wa daw man ha ki bnai wow wan, u Hek da ong u wa da yaklam wa kiwa yahkhmat ka Party ha Delhi.
“Ka BJP man ko kawi na ki Party wa heh dooh ha ka ri India, nga da yaklam oo wa kiwa yahkhmat ha Delhi wa ki toh u pynyeiñ kyrtong bait ki neibynta ka Election MP ha kani ka jylla,” da ong u Hek.
Discussion about this post