U DC ka East Jaiñtia Hills da pyntip u wa ynne ka sngi, hapoh i pait u J. Shylla, MCS, Additional Deputy Commissioner, East Jaintia Hills, da tympdung wei tympra ya ar tylli ki karkhana Coke kiwa da chna khlem da yoh bor namo ka Consent to Establish (CTE) naka Meghalaya State Pollution Control Board.
Da ya emlang leh ki bru u Superintendent of Police, East Jaiñtia Hills, ki bru na Meghalaya State Pollution Control Board wa na District Commerce and Industries Centre.
Kini ki ar tylli ki karkhana Coke wa da chah tympdung toh kawa tip kam ka M/S Halari Coke Plant wa em hapoh ka Sutnga Elaka waka M/S Shauryansi Coke, Wah Samsier, Sutnga, East Jaiñtia Hills District.
Ya ini da leh katkam ka hukum wa da pynmih, kitæ ka Office Order No: EJHD/GENL.261/COKE/Pt.IV/2023/151 Dated 7th July, 2023 waka Order No: EJHD/GENL.261/COKE/Pt.IV/2023/152 Dated 11th July, 2023.
Kini ki hukum wa da pynmih da u DC toh neidaw wa kini ki karkhana kiwa da krehkaam dei rieh dei tooh ye ki wow pynemkaam da u mooyong wa mih napoh ka District iwa daw pynchlur yei tih mooyong pyrchah ya ka aiñ hapoh ka District.
Yeini i tympra ynne da leh deiwa tympdung Bomb heiwa ya ka M/S Halari Coke Plant da tympdung heipor kamwa 12:00 waje pyrdi sngi katwa ya ka M/S Shauransi Coke da tympdung heipor 3:30 i sngi wei da leh yeiwa emkaam yow pyntikna wym em kiwa mynsoo ha ini i jia.
Chooh chooh da pyntip wa ini daw pteiñ i ha kini ki tayaaw pyrchah ya kitu ki karkhana wa da chna pyrchah ya ka aiñ hapoh ka District kiwa da em waroh 34 tylli.
Discussion about this post