Shillong: Hei yatoh wa i psiah ki 12 ngut ki MDC ka KHADC cha ka PDF neiliang uwa thoh khubor da yoh u yaklam wa kiwi kiwa yahkhmat ya ki seiñ saiñpyrthai ha ka jylla wa kynthup na ka party Congress wa HSPDP wei neiliang ka Congress u John F Kharshiïng da kitbok u ya kani ka party wa thymme tangwa da ong u wa kam ki MDC kamjooh kiwa ksoh kam ki EM ye hi ki u pyndep ya ka kaamram kawa da ekti ha ki manda kwah ku ki cha ka kyrdan MLA.
U John da ong u wa ki paidbah toh u bichaar ki ya ki kaam wa da leh ki ha ka KHADC wei ye ki namo ym ye u pynhun yeiwa thrang wa angnood ki paidbah.
Da e nongmuna u ya dorbar yong ka Hima Mylliem wa ym pu ye u pynman hadooh katni da boon snem wei ini toh i kaamram ka KHADC. Da ong wa ini toh i bynta wa khian dooh wa ki MDC ka PDF toh u jubab ki cha ki paidbah.
U Kharshiing da ong u wa ki party mih ki wan ki lai ki kamwa da yoo, ki party wa thymme chem chitom ki wei hawa bichaar yeiwa jia nadooh nachwa da pynsakhiat ya ini.
Kini ki MDC kiwa psiah cha ka PDF ymtoh kiwa thymme wei ki man ki kiwa dadep sum ha ka politics wei i kam ka PDF man i iwa khooid toh i nia politics wow pynksan pyn da ki ya ki hi.
Katwa u MLA ka Rambrai uwa man leh u Vice President ka HSPDP, u KP Pangiang da ong wa ka PDF toh ka kawa kha na ka Congress wei uwa yahkhmat ya ka u Pynshngain N Syiem toh uwa da chah beh (suspend) ha ka seiñ Congress.
Da ong u ki paidbah da yoo hi ki wa boon ki dkhot ka PDF toh kiwa mih na ka Congress weiwa i lai psiah ki kattu katni ngut ki MDC ka HSPDP cha ka PDF daw ktah ko khajak tangwa daw ktah joor ko ya ka Congress.
Heijooh ipor da ong u leh wa i beiñ ki MDC ka PDF ya kiwi ki party riloom wa ki ym ye ki u leh iyi iyi leh toh pyneh snieh pathoo hi-eh ki.
U Vice President ka HSPDP da ong u leh wa ka PDF wat tang ya ka chaap leh ympu yoh ko wei kam ko wa man ko kawa khlan kawa da yoh yei kyrchaan ki paidbah toh iwa artien bha.
Also Read: Da psiah PDF ki 12 ngut ki MDC ka KHADC
Discussion about this post