Ka Iawpynsiñ Wahiajer, West Jaiñtia Hills District ynne ka sngi heipor chiteiñ sngi kamwa 12:30 da kop diñ syndet ko wei da chah baam dooh boon tylli ki dukan chong yaw.
Neidaw wa ynne ka sngi wymtoh ka sngi yaw, ym em wa yoo næ tip kammon i diñ sdang i, wei du hadien wa i diñ da kyrooh wei mih tdem cha suiñ ki paidbah yoo ki.
I bynta wa da iñ toh i thaw dai wait, dai wakhu wei da wan tympleh da ki kari ka Fire Bridge kiwa da wan artylli wei ym pu tip yei daw wa sdang i diñ.
Neiliang u Asst. Secretary ka Iawpynsiñ Wahiajer, u Jameson Synrem uwa wan emkaam ha kani ka yaw da khana u wa oo leh da yoo u yeini i diñ hadien wa i diñ da kyrooh i.
Mar heitæ wot da pyntip u chaki pulit tympleh diñ namo ka Fire & Emergency Service wei kat wym pu poi ki kari tympleh diñ, ki paidbah wa wan sakhi da pyrchang ki u tympleh daka um wa em ha kani ka yaw.
Heini i jia da khana u wym duna ya 40 tylli ki dukan chong yaw wa chahktah.
Heijooh i por e khublei haroh u yaka Fire & Emergency Service yei smat poi yong ki iwa da ye u khanglaad yei poor i diñ cha kiwi won ki dukan.
