Ynne ka 15 tarik heipor 12:00 waje pyrdi sngi neidaw wa suba toh wa thut i bordiñ, i yung yong u Medri Lamare wa ka Tikna Hadem da chah baam lut i ha i diñ tangwa da embhah ym em wa mynsoo na ini i iñ yung wei ym em yoh i leh wow poor cha ki jan yung.
I dooh nong da antaad da poi i hadooh T. 6 lak wa kynthup ya u khoo, u kba, ka poisa wa kiwi ki mar wa kordor ka manyung.
Ini i yung toh iwa em ha Mooshrot, West Jaiñtia Hills wa haap hapoh ka Laskeiñ Block.
Neiliang yong u Education Secretary yong ka KSU Jaiñtia Hills District u Justice Paul Lyngdoh uwa man leh u tre chnong ka Mooshrot, da beiñ u yei tlot ka sorkar hawa man-ki-por da jia kam kini ki jia wa iñ yung ha ka thaaiñ wa haap hapoh ka 4-Mowkaiaw Constituency wei ym jooh em ye wow poi ha i por wa biang ki kari tympleh diñ neidaw wa jngai ware wa booh ya kini ki kari heiwa da toh wow em ka wi ha Raliang Outpost nadooh nachwa.
Da ong u leh wa kut wa jia wa em wa iñ ha Mowkaiaw, ha Mowtyrshiah ha kini ki snem wa da dep, kat u poi ka kari tympleh diñ kawa em ha Saphai Outpost næ na Jowai, i yung da iñkhaw lut i.
Da kyrpaad leh ya u MLA ka Mowkaiaw u Nujorki Sungoh wa na u Home Minister wow sñiawbha wow booh ka wi ka kari tympleh diñ ha man ki Outpost khnang wow suk u yabeh yow tympleh diñ ha iwon iwon i por wa ha i por wa biang.
