Ynne i step synyaw ka 8 tarik, iwi ka trep masi yong u Yielding Lyngdoh da chah baam dooh i ha i diñ hadooh wa kylla tpai lut ki masi 6 tylli ryngkat wa 2 tylli kiwa da jan kha khon iwa em ha chnong Lumputhoi, Elaka Rymbai, East Jaiñtia Hills.
Hadien i hiar slap ynnin ka sngi, uwa chare masi ryngkat wa u paralok yong oo da booh diñ ki neidaw wa kjam u slap tlang, wei da booh diñ ki hapoh trep masi chwa u khang ya ki masi. Hadien wa dep khang ya ki masi, uwa chare da liwan oo cha yung wei da ieh u yei diñ khlem tympleh iwa da khai ky’rooh hadooh wa da poi cha ini i jia.
I lut i sep da antaad wa da poi ko cha ka T. 2,40,000.
U tre masi u Yielding Lyngdoh deilang wa kiwa yalam chnong da booh ki yei kyrpaad hakhmat ka sorkar khamtam kiwa mihkhmat wow sñiawbha ki u chimkhia wow e ya ki kti yarap ya u tre wada em i dooh nong kamjooh i lutsan wa chyrkhei.
