Shillong: Uwa bichaar namo u Judge warim ka Gauhati High Court, u Pranoy Kumar Musahary ynne ka sngi da baam smai u kam u Chairperson wa nyngkong ka Meghalaya Lokayukta wei da kyntu u ya ki paidbah yow krehlang waka Lokayukta wei wow ujor pyrchah ya kiwa emkti ha ki kaam baam-tooh.
Ya i pynbaam smai da leh da u lat ka jylla u Tathagata Roy ha Raj Bhavan wei da wan sakhi lang u montri ka kaam uiñke suwari u Metbah Lyngdoh, u montri ka chnat puræ purthi u Lahkmen Rymbui uwa yahkhamt ka liang pyrchah ka yung dorbar, u Dr. Mukul Sangma deilang wa ki sahep sorkar wa kynthup ki heh ka chnat pulit.
Ya u Musahary da jied da ka Committee kam u Chairman ka Lokayukta ha u Naiynru uni u snem wei da phah leh ka Supreme Court wow leh smat ya ini i kaam.
Hapoh ka Lokayukta daw em leh soo ngut ki dkhot wei hadien soo snem wa da pynman aiñ ya ka Meghalaya Lokayukta Bill, 2014 da ye wow pyndep ya kani ka kaam.
Nyngkong hapoh Meghalaya da em ka Lokayukta Act, 2012 tangwa da pyndam ya ka hadien wa wan ka aiñ Meghalaya Lokayukta Act, 2014.
Ka Meghalaya Lokayukta Act toh kawa da chna yow pait ya ki kaam baam-tooh kiwa wanrah pyrchah ya kiwa kreh sorkar nadooh u montri rangbah, u symbood montri rangbah, ki montri, ki MLA, ki sahep sorkar hadooh kiwa kreh sorkar hi waroh kawi.
U Musahary hawa yaklam wa kiwa pathai khubor da ong u wa emkaam ki paidbah u man ki kiwa chlur wow ujor pyrchah ya kiwon kiwon kiwa emkti ha ki kaam baam-tooh wei da kyntu u leh ya ka sorkar Meghalaya Democratic Alliance (MDA) wow smat ki wow thung ya ki soo ngut ki dkhot ka Lokayukta.
U Chairperson da ong u leh wa emkaam wa ka sorkar u thung ko ya ki sahep sorkar yow man kam u Secretary ya ka Lokayukta wa kiwi ki sahep kam kiwa em ha ka kyrdan SP yow man ki kam kiwa takit nyngkong ya kiwon kiwon kiwa chah pynbaad hei baam-tooh.
Discussion about this post