Jowai: U Chief Engineer ka PWD (Building) Meghalaya, Shillong da pynche u wa i daw wa oor chibynta i chram kær pood ka Jowai Public School ha i step yong ka 14 tarik toh neidaw wa leh hi kiwa pynlai ka skur.
U Chief Engineer da ong u wa i daw wa oor ini i chram toh neidaw wa pyndap khyndaw iwa jrong kamwa 2 meter na chiliang i chram wa em neiliang ka skur ha u Naisaphra (Aug) 2018 lyngba ka School Development Fund wei yeini da leh khlem pyntip cha ka PWD (B) wei ha ka 11 tarik uni u bnai hadien wa u Executive Engineer ka PWD (B) Jowai Division da lai u cha kani ka skur yow pait yei kreh wow chna ya ka Examination Hall da pyntip cha oo wa ya ini i kreh da sdang da kiwa pynlai ya ka skur.
Da pyntip wa neiliang u Junior Engineer ka PWD (B) da boonsien da kyntu u ya kiwa pynlai ka skur wymhoi u pyndap khyndaw ha tre i chram neibhah daw pyntlot ko yei bor ini i chram.
I bynta i chram wa oor toh iwa jrong lynter kamwa 31 Meter wei da chna ya ini i chram ha ki snem 2002-2004 iwa jrong 1.25 Meter wei ha u Naikhynde (Sep) 2017 da pynjrong ya ini i chram da 0.75 meter wa sa 0.30 meter deiwa booh ya ki Grill iwa da leh hadien wa kypaad u Principal ka skur.
Da ong leh wa ini i chram ym em oor i neidaw wym em biang i rukom chna ya ki kamwa da chah pynbaad ka chnat sorkar ha ki kotkhubor wei neiliang u Principal ka skur leh da bahkhlieh u yeini wa oor i chram ha khmat ki Magistrate neidaw wa pynkreh ki ya ki kaam khlem da pyntip cha u Engineer ka PWD (B), Jowai.
Discussion about this post