U Madonbai Rymbai, CEM warim ka JHADC hawa pynsñiaw ya ki daw wa da lai u wow kyrchaan ya u Awhai Andrew Shullai kam u kyrtong ka TMC naka 2-Jowai Constituency. Da ong u wa ha ki 5 snem wa da dep da bakla u wow jied MLA da u bru wa chah hukum da kiwa ha-yung wow lai ñiaw katwon tylli ki top psiang wa katwon Dumper u moochip wa em hajan Umroi neibynta wow siang sarok.
Da phla u leh wa kini ki bru da khut ki ya oo du ha i por wa dait thah wei manda chit won da pooh kylla ki ya oo, wei i chah dung yong oo kam uwa yahkhmat da man kamjooh hi ha u paidbah.
Ya kini ki kyntien da klam u haka yalang pynskem ya kiwa kitkaam Block Committee, Meghalaya Pradesh Trinamool Congress yong ka 2-Jowai Constituency ynne ka sngi ha madan Jrisaleiñ Jowai, heiwa da emlang u Charles Pyngrope, President TMC Meghalaya, u Dr. Mukul Sangma uwa man leh kam uwa yahkhmat ka Liang Pyrchah, u George Lyngdoh, MLA Umroi wa kiwi de.
Hawa beiñ yei synchaar ka sorkar MDA hapoh i yahkhmat ka NPP, da ong u wa kani ka Party da man ko katæ ka National Permit ki High Level, ka wym em kyndon krehkaam de wei wot ka District Council leh da maad ko yei eh wow yoh tulop da ki snem wot hawa u Montri Rangbah wa u CEM ka JHADC toh ka jooh ka Party.
“Ha i por wa nga man MDC 15 snem wei da yoh man CEM arsien, ym jooh em ka dooh tulop wei wot ka Scheme leh katwa ye da pynpoi cha ki paidbah, tangwa ki MDC wa katni won ym leh ki iyi iyi,” da u Madon.
Da kob u leh wa ka Iawmusiang toh kawa ieh da oo, hadien wa u rem u da sahkut, da pynbaad u leh wa ka District Council ym jooh pep ko wow khrong dan ha ki yaaw tangwa i chna ya ka yung yaaw won ym em.
Hawa yaroh ya ki kaam u Dr. RC Laloo, MLA warim ka Jowai, da kyntu u ya ki paidbah wow kyrchaan pura ya u Awhai Andrew Shullai uwa man ha kti ha kjat u Dr. RC Laloo khnang wow ye u pynwandur yaka rukom synchaar kam haki por nachwa.
