Ka Khasi Students Union War Jaintia Circle ha ka 19 tarik uni u bnai da lai khynra wei lai pait ko ya ki kot ki sla yong ki baar jylla kiwa em hapoh Amlarem waroh kawi, wei yeni da yahkhmat da u President, u Laitphar Syngkrem, ka President Girls’ Wing ka Ladaplyne Hayong wa u General Secretary, u Lurman B Talang.
Ha ini i lai khynra da chem wa em san ngut ki baar jylla ki wym biang ya ki kot ki sla wei chong pyrchah aiñ hapoh ka chnong Amlarem heiwa ka seiñ da beh noh ko na katai ka thaw.
Da seiñ da pyntip ko leh wa em ki baar jylla kiwa da yoh wow yut wow rieh cha khloo hadien wa da sñiaw ki yei khynra ka seiñ wei ki dkhot yong ka seiñ da lai thooh ko ya ki tangwa ym chem de ya ki kiwa da rah lang wa ki muna yong ki.
Ka seiñ da ong ko wa katwa dang mih ki sngi, ki baar jylla nang boon ki neidaw wa e laad weiwa e NOC ya ki wow yoh ki u seiñ khih ha kini ki thaw yong i. Ka seiñ da ka kyntu ko ya ki bor wa toh u pait wa ym toh u e laad ware ki khnang wa ki baar jylla ym yoh ki wow laitlan ware ha kani ka thaw yong i.
Chooh chooh da ong wa ki baar jylla hapoh Amlarem da nang boon ki wei hajrong ini yow ye u kdoh u khoom toh du nei e NOC ya ki. Ka seiñ da ong ko leh wa ym chong klikti wei daw khynra chooh neini chakhmat wei ini toh i sdang wa dang khian. Ka seiñ da e khublei ko ya waroh ki dkhot yong ka kiwa wan chimbynta ha ini deilang wa ki khon khynroo ka chnong waki dkhot yong ka VDP Amlarem.
