Dei maya yong phi a Bei a Pa,
Hadooh wa da poi O heini i rata;
Lada khlem da phi heini ha pyrthai,
Ya nga yi wow pait yi wow pusai.
Ki Blai man phi hei rta yong nga,
Ya nga wa sumar wa sute wa lana;
Dei yi won de u su kylliang ya phi?
Sadu dei maya wei akor wa bha donhi.
I maya yong phi wym ye de u wyrchaw,
Da tymmoh bneiñ tymmoh khyndaw;
Katwa dang im katwa dang chynna,
I burom wym kut de ya phi “Bei Pa wa maya”.
Kynmoo O yei khana parom ha chwa u thiah,
Wa ya ap i kyndiang chi payu chi diah;
Wa’u pynrkhai ya i wow takaliaw,
Ha kitu ki por wym tip i yei diaw i tliaw.
Kam kitu ki por heiwon de u chem!
Ki por wa dang em o ha jrong yupiam;
Wa kdung wa kdup dap du i maya,
Wa doh wa dait wa kyrhu phi nga.
Hawa pat wa oor’ kylla nood phi,
Manda yaam da kiat o sahiar i mynsien phi;
Sneiñ kroo phi ya nga da ki kyntien wa thiang,
Yow lait O u man u wa theh chiliang.
Ong phi ya maya mo khon chi payu,
Yow lait nei chah klam chah beiñ ha ki bru;
Pyrthai katni su i ya bichni,
Ya toh yumut mo khon para phi…
Khih chitom phi wa miet wa sngi,
Tang wow yoh phi u pynbiang ya i;
U slap u phria ym bna phi oo,
Tang wow biang i ja yow dap u khoo.
Rta wym mylliñ de ha nga,
Ym du ha nga wa ki payu diah wa pyrsa;
U blai Trekirot wow kyrkhu,
Yei maya yong phi ya i ya nga.
Discussion about this post