Jowai: Ha ka rynsan yalap Election MP ka Party Congress ynne ka sngi ha madan Iawmusiang, Jowai, ki MLA wa kynthup ya u H.M. Shangpliang, ka Dr. M. Ampareen Lyngdoh wa kiwi ki da beiñ joor ki ya ka sorkar BJP wa yahkhmat da u Modi deiwa pynbaad wa man ko ka sorkar kawa shynchaar embor wa wanrah yei eh i khoo wa boon jait yaki paidbah khamtam kiwa dooh wa ki warep.
Da ong ki wa ka BJP toh kawa pyrchang wow wanrah ya i sñiaw yapher jaitbru hapoh ka ri, wei da thmu ko leh wow ksih ya ki khian paaid ka thaaiñ mihsngi deiwa pyrchang wow wanrah yaka Citizenship Amendment Bill. Kamtæ kyntu ki ya ki paidbah wa ki ym toh u e laad ki ya kam kani ka sorkar wei wow kyrchaan ya u V.H. Pala uwa em haka Party kawa ye wow sñiawthooh ya i eh ki paidbah uwa ym em wan ha kani ka yalang.
Chooh chooh da kdaw ki hajrong ki kattu katni kiwa da leh ka BJP ha ki snem wa da dep kawa da pynchitom ya ki paidbah wei kawi na kini toh wow pyndam noh ya ka poisa T. 500 wa T. 1000 warim kawa da pynchrai ya ki paidbah.
U Shangpliang da ong u wa lada u Modi u poi biang u hei bor emkaam yaka Party Congress wow yasaaid neibynta u paidbah.
Chooh chooh da ong u wa ka sorkar u Modi ka ym ye ko wow booh bynta wa kyrpang neibynta ki kynthai, katwa u Rahul Gandhi won da kular u mang kyrpang lada poi haka thong.
Heiyatoh wa ini da ong u du ka Congress kawa man ka Party kawa ye u wanrah ya ka roi ka paar chadooh cha nongkyndong, wei da kop u leh wa lada u Vincent H Pala u jop biang u ha kani ka kynti daw yoh u leh wow man kam u Union minister ha Delhi.
Kiwi de wa e yei klam toh u MLA ka Saipung Sutnga u Shitlang Pale, u Dr. P.B.M Basaiawmoit, u CEM warim ka JHADC u M.B. Rymbai, nalor kiwi ki MDC ka JHADC wa kiwa kyrchaan.
Discussion about this post