Ka Executive Committee yong ka Dorbar Chnong Mowkaiaw kawa da pynman haka 14 tarik uni u bnai, dei sñiawkhia da beiñ joor ko yei klam u Nujorki Sungoh, MLA ka 4-Mowkaiaw Constituency, ha kawa da kam u wa toh oo wa pynyoh ya ka Scheme chna sarok kawa 6 Km ha Mowkaiaw hanla ya kani da e da u Montri Rangbah, u Conrad K Sangma.
Ka Executive Committee da ong ko wa i klam u MLA toh heipor wa wan wai u ya ki ar tylli ki mooyurim ki Central Scheme yow chna ya ki yung skur ha chnong Mowkaiaw ha ka 9 tarik uni u bnai.
Ka Executive Committee yong ka Dorbar Chnong Mowkaiaw da pynsñiaw ko leh yei sñiawsih wa khroo yeitai wym kheiñ de u Nujorki Sungoh uwa da ong, “Officially, u pynbna O wa ya kani ka Sanction kawa duna 6 klur da pynyoh na ka bynta ka sarok heini hapoh chnong Mowkaiaw”. Ha jrong ini Ka Executive Committee kwah ki wow pynche cha ki paidbah hajrong itai i klam wa man i iwa bakla neibhah ya katai ka Sanction da dep pynbna chwa da u Montri Rangbah ha ka 22-08-22 ha i pynskem ya kiwa kitkaam yong ka Party NPP ha Mowkaiaw hi.
Chooh chooh da kdaw wa ya katai ka sarok da dep wow Sanction da ka sorkar toh lyngba i booddien ka Executive Committee hakhmat u Montri Rangbah ka jylla yong i ha i por wa wan u cha ka lehkmen Golden Jubilee ka Sawlyngdoh Higher Secondary School Mowkaiaw ha u Kmaichonglad (Dec), 2021.
Wei ym du ini, ka Executive Committee yong ka Dorbar Chnong da pynlut por ko leh da kiwa boon ki sngi wa ki bnai wow lai booddien ya itai i kaam cha ka yung krehkkam u Montri Rangbah na i por cha i por ryngkat wa i yarap u Sniawbhalang Dhar uwa man leh kam u Montri sorkar jylla hadooh wa da yoh ya ka Sanction.
Da pynkut ya ka kyrwoh deiwa ong wa ka chnong Mowkaiaw ya utai u sarok wa 6 Km toh bait du da iwa wyrai u Montri Rangbah ya ka chnong yong i lyngba u Sniawbhalang Dhar uwa da kyrchaan borbah ya itai i kyrpaad khian yong i kam ka Executive Committee ka Dorbar Chnong.
Puræ leh: Booh mooyurim u Nujorki yow chna ar tylli ki skur ha Mowkaiaw
