Jowai: Ka Khasi Students Union – Jaiñtia Hills District Unit da beiñ joor ko yei kamtre u President ka Meghalaya People United Front (MPUF) u Dapoiwanmi Laloo yaka dukan u baar jylla kawa tip kam ka ‘China Bazar’ kawa em ha Iawmusiang.
Ka seiñ da pynsñiaw ko yei phylla heiwa kat da u wa yahkhmat seiñbhalang wow leh u ya kam kini ki jait kaam kiwa man kam wow elaad ya u baar jylla wow booh dukan ki ha Jowai.
“Lada elaad kamni, khlem pep ki paradoh parasnaam yong i daw chah knieh lut i khayi pateiñ ha ki baar ri.” da ong ka KSU.
Da pynrap ko deiwa ong wa “pyn na i pyrtuid dukan da che toh i dukan ki baarjylla wei iwa rap phylla chooh chooh toh wa ym em uwi wot leh uwa na China ha Jowai”.
Da ong ko wa boosien hawa lai kynreh kot Trading Licence ko na ki dukan ki baarjylla jooh wan bait ki tre ri wow yada ya ki wei ini booh ko i eh ya ki seiñ kamjooh ya ki bru sorkar wow khang ya kam kini ki dukan kiwa ym em kot.
Kamtæ da maham wa lada ki chem wa ki dukan toh ki yong ki tre ri emkaam wow booh ya kiwa kreh kamjooh ki manager da ki tre ri hi ymtoh da ki baar jylla.
Ka seiñ da kyntu ko ya u Dapoiwanmi Laloo wa lada oo toh u tre dukan tæ emkaam wow pynkylla u ya i pyrtuid ka dukan wei wow thung da kiwa kreh wa ki Manager tre ri.
Da maham ko leh ya waroh kiwa kam tre ya ki dukan ki dkhar wow sangeh wei wow dam noh ki u leh kamni.
Discussion about this post