Beiñ joor ka SBYWA ya ka sorkar jylla deiwa yaroh kyrpang ya ka Balang Presbyterian Rymbai

Khliehriat: Ka seiñ Southern Border Youth Welfare Association (SBYWA), kawa haap hapoh ka Elaka Rymbai & Lakadong, East Jaiñtia Hills District da e khublei kyrpang ko ya ka Balang Presbyterian Rymbai, ya ka chnong Rymbai wa ya ki Tymmen Wasan, u J.R.Pyrtuh uwa man kam u MDC Bataw, ka Violet Lyngdoh kawa man kam ka MDC Rymbai Khliehriat wa da em ktilang ki wow pynmiat pynbha ya u sarok RBBJ wa nadooh Ladrymbai- Rymbai u wa jrong kamwa 6 KM.

U Namphrangmi L Talang General Secy SBYWA da ong u wa u ni u sarok Ladrymbai- Rymbai da booh sakhiat ko yei eh i khoo ya ki paidbah wa lai wa wan ha kini por wa dep neibhah wa da joor ware i sih u hawa da booh ko hei chitom ya ki paidbah wa lai lyngba uni u sarok khamtam ya kiwa na ki chnong wa kynthup ya ka Bataw, Lakadong , Iapmala, Suchen, Lumskhen, Umshong wa kiwi kiwi.

Chooh chooh uni u khynroo da khana u wa ha ka 1 Naitung (April) 2017 hadien wa ka seiñ da yoo ko yei chitom ki paidbah wa lai wa wan lyngba uni u sarok khamtam wa da joor ware i sih u neiliang ka seiñ da e dorkhat ko ha u Justine Dkhar, u MLA ka 6 Khliehriat Constiteuncy.

Ha ka dorkhat ka seiñ da kyrpaad ko ya uni uwa mihkhmat yong ka thaiñ wow pynbha pynmiat ya utai u sarok RBBJ nadooh Ladrymbai-Rymbai hadooh ka chnong Borkhat, wei neiliang u Dkhar da kular u hakhmat ka seiñ wow yaleh chitom wow chna pynmiat (repair) ya uni u sarok deiwa yaklam wa ka tnat PWD khamtam wow pynap pynsñiaw yei eh yei khoo yong ki paidbah cha u Montri PWD Road yong ka Sorkar Jylla u MM Dango neibynta ini.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ha kini ki por wow wan ka seiñ SBYWA daw yachem biang ko sa ya u MM Dango, Montri ka PWD Road ha kini ki sngi wa daw wan neibynta uni u sarok LRBBJ wow dawa wow chna pynmiat noh khnang yow suk ki paidbah.

U Talang da beiñ joor u ya ka sorkar jylla kawa yahkhmat da ka sorkar Congress kawa da pynbor ya ki Balang Niam, ki paidbah ki Waheh Chnong khamtam ki paidbah wa haap ki da ki wow pynlut wow chna pynmiat ya uni u sarok.

Kamtæ ka seiñ kyrpaad ko ya kiwa mihkhmat yong ka thaiñ East Jaiñtia Hills District u yaklam ki wa ka sorkar jylla neibynta u pynwiar ya i eh i khoo yong ki paidbah khamtam wow pynbha pynmiat ya ki sarok wa em cha jan khappood kiwa dangsahdien hadooh kini ki sngi.

Also Read: Mih yonglang ki paidbah hei yahkhmat ka Balang Presbyterian wow pynmiat ya u sarok Rymbai Road