Ka seiñ United Hynñiewtrep Movement – East Jaiñtia Hills District (UHM-EJHD) da beiñ joor ko ya i chah thombor u president ka seiñbei (Central Body), u Charlie J. Rani ha ki damok wa em kamwa 30 ngut kiwa kam wa toh ki dkhot ka FKJGP wei da thombor ki leh ya u Sports Secretary, u Michael B Dkhar wei da kit yabor won leh ya u Assistant Organising Secretary u George Iawphniaw hei step 11:00 waje ka 15 tarik uni u bnai.
Ha ka yalang wa da chong jhan, ki dkhot yong ki Unit wa ki Circle waphær waphær yong ka UHM-EJHD ynne ka sngi da chim ki ya i rai wa lada ka FKJGP embynta sakhiat ko wow thombor ya u President ka seiñ, ka UHM leh hapoh East Jaiñtia ym tipmit de ko ya ka FKJGP wei i yatoh leh u tkut noh i nadooh ynne ka sngi kat wympu pynche ka FKJGP deiwi tawon.
Ha iwi i liang ka seiñ UHM da kylli ko ya kini ki damok ha iwon i dur wa nood ki wow wan thombor ya u President yong ka? Lada em kiwon kiwon ki heh kiwa da leh bakla næ klam bakla ya ka (FKJGP) toh u em i yaklam namo ka aiñ ka wow bichaar, ymtoh wow lai thombor ya ki ha i yung.
Neiliang ka UHM-EJHD da kyntu ko ya ki bor ka aiñ wow chimkhia wei wow pynsmat wow kem ya kini ki damok wei wow pynchitom ya ki katkam ki kyndon ka aiñ.
Kani toh katkam ka Wyrta na u president ka UHM-EJHD, u Brosen Siangshai.
