Ka Balang Katholik Jowai Diocese da beiñ joor ko ya kiwon kiwon ki bru wa kiwa chim kabu kiwa da thoh pynbaad yei ngait, yei sñiaw yong ka Balang Katholik lyngba ka Social Media iwa da chem hawa yei dur u Jisu, ka Maria wa ki dur ki lyngdoh wa ki bru-niam yong ka Balang da pynemkaam ha i rukom wa khlemakor wei da ktah yei ngait wa i sñiaw yong ki khon ka Balang Katholik ha waroh ka Jowai Diocese.
Da ong wa ha kini ki sngi kiwa da dep da yoo ha ki Social Media wa em boon ki dur wa ki Video kam ha ka Facebook, WhatsApp wa kiwi kiwi iwa da ktah yei sñiaw yong ki khon ka Balang Katholik heiwa da yoo wa kam kini ki dur da pyndooh burom deiwa da pynpoor ha ki Social Media.
Neiliang ka Synjuk Ki Seng Rangbah Katholik Jowai Diocese, Synjuk Seng Kynthai Katholik Jowai Diocese, ka ICYM Jowai Diocese wa ka Catholic Association Jowai Diocese da beiñ joor ki ya kam kini ki thoh beiñ yaka ya ka Balang.
“Kam ka Balang hi waroh kawi i beiñ joor i ya kam kini ki thoh pynbaad wei lada dang jia chi jia kamni, i kam ka Balang Katholik daw hap i wow chim da ka luti kawa eh yow kdooh u khoom ya kam kini ki bru chim kabu.”
Kamtæ da kyrpaad joor ya kiwon kiwon ki bru kiwa em iwon iwon i sñiawthooh bakla chaphang i ngait Khristan Katholik, wa ka Balang smat ko wow yaklam pynche dei wym toh u thoh pynbaad wei toh u em i burom markylliang ya i sñiaw wei ngait yong kiwi won.”
Ka kyrwoh na u Mutshwa Thabah, President Indian Catholic Youth Movement Jowai Diocese.
