Ka BJP Yuva Morcha (Meghalaya) da beiñ ko yei klam u Vice President ka seiñ, u Dipyan Chakraborty uwa ong wa ka Party daw pyrkhat ko yei wow lai yaklam pynbait hajrong i wym sñiawthooh wa ka sorkar MDA.
Neiliang u Vice President ka Yuva Morcha, u Wallambok Khongwir da ong u wa i klam u Dipyan Chakraborty da phiah i ya ka Party wei da lailait i leh ya ka riti synchaar yong ka.
Da ong u wa u President kamjooh kiwa kitkaam ka Party, i kaamram yong ki toh wow pait yei bha i miat ka Party khamtam neibynta ka Election 2023 wei i kaamram kiwa mihkhmat toh wow pait ya i kreh bha ka sorkar jylla.
U Khongwir da ong u leh wa kam ini i klam kiwa kitkaam ka Party hawa emlang ko wa ka sorkar daw pynhiar dor i ya i long i man ka Party wei kam ini daw yarap i ya ka Congress ha ka Election 2023.
Chooh chooh da ong u wa ki kattu katni ngut kiwa kitkaam ka Party da daisarom ki ya u National Vice President wa u Meghalaya State In-charge, u Dr. Chuba M Ao hajrong wa da kyntu ya ka Party wow klam cha kiwa pathai khubor pyrchah ya ka sorkar.
Heijooh i por da ong u wa lada ymye wow pynbait ya ini i kaam neiliang ki dkhot ka Party daw yakhih ki wow dawa kylliang ya kiwa kitkaam ka Party.
