Ka Catholic Association da beiñ joor ko ya iwa jia ha i thaw wa chna yaka St. Xavier’s Girls Hostel ha Umoid, South West Khasi Hills hadooh wa da dooh yei mynsien yong uwi wei da mynsoo boon ngut iwa da jia hei miet ka 24 tarik.
Kamtæ da kyrpaad ya ki bor ka aiñ wow pynman yaka takit wa pliah yow wanrah ya kiwa emkti hakhmat ka aiñ wei wow khanglaad leh ya kiwa thmu wow pynthut yei suk i saaiñ ka thaaiñ.
Da ong leh wa ka St. Xavier’s Higher Secondary School toh kawa sdang ha u 2019 wei man ko leh kawa nyngkong ka skur wa da pynemkaam yaka Jainsem kam ka riam skur (Uniform) neibynta ki kynthai wei kiwa boon ki khynnah skur ka St. Xavier toh kiwa wan na ki manyung ki warep wei kamjooh kiwa dooh wa duk.
Ka College yong ka St. Xavier toh kawa da pynbait wow sdang ha u Naiynru uni u snem. Heiwa da yoh bor na u Directorate of Higher and Technical Education wei dang em hei bynta wow yoh yei tipmit naka North Eastern Hills University.
Neidaw ka khlam, i kreh kani ka thaw puræ da sahdien i wei yow ye u pyndep heipor yow sdang yaki Class ka College hap u pyndep smat yei kreh kamtæ da emkaam wow wanrah chooh ya ki bru wakreh.
Da i thmu wa bha, kani ka thaw puræ da paan bor ko leh na waroh kiwa emkaam tangwa da sñiawsih wa em won kiwa leh ya ini i kaam iwa da poi chei dooh yei mynsien bru wei da mynsoo 7 ngut.
Ka kyrwoh na u Barnabas Nongbah, General Secretary.
