Jowai: Ynne ka sngi kiwa kitkaam ka Joint Action Committee (JAC) yong ki le seiñ wa kynthup yaka All Jaiñtia Cement and Clinker Transporters Association (AJCCTA) wa ka Jaiñtia Hills Truck Owners Association (JHTOA) chirup waka Meghalaya Truckers Union (MTU) da pynsñiaw ki yei khyrngiat wei mynsien phylla hawa yoo wa wanpoi syndet ki pulit ha Gate wow psiah cha ka karkhana Star Cement.
Ka JAC ynne hadien wa kut ka yalang wa kiwa kitkaam ka All Jaiñtia Cement Manufactures Association (AJCMA) ha Topcem, Wahiajer, EJH hajrong i dor thymme wow kit mar, da rai ko wow sangeh noh chwa u lai kit mar cha ki karkhana pynmih khyndaw-bilat.
Hajrong ini i rai, ki dkhot ka JAC da lai ki cha Star Cement wow pyntip ya ki tre truck (transport) wa em ha kani ka karkhana hajrong kani ka rai tangwa mar poi ha kani ka thaw da wanpoi chwa ki CRP wa ki pulit kiwa da khang luti ya ki dkhot wow psiah cha kani ka karkhana.
Hadien wa yañia ki dkhot ka JAC wa ki bor pulit hajrong i daw wa chah khang ki wow psiah cha kani ka karkhana wow pyntip ya ki karkhana hajrong kani ka rai, da wan kiwa pait ya ka, kiwa kynthup ya u Tejbir Singh wa u Devandar Bansal.
Neiliang kini ki ar ngut da ong ki wa i daw wa khang ya ki toh wa em ki dkhot ka JAC boon ngut wei boon hi kiwa yah truck (transporter) kiwa em hapoh ka karkhana leh tieñ ki khamtam hadien wa yoh yutip ki ha kini ki sngi wa dadep wa da phah sangeh ya ki wow kit mar ki.
Hajrong ini neiliang ki dkhot ka JAC da pynsñiaw ki wa emkaam hi-eh ki wow yaklam wa kiwa yah truck chirup i sonteri ki pulit tangwa hanla kattæ leh ym yoh ki (JAC) wow psiah yaklam wa kiwa yah truck.
Ini waroh da pynkusa i ya ki dkhot ka JAC kiwa da beiñ joor yeini i em ki pulit ha kani ka thaw neibhah wa ki lai ki cha kani ka thaw dei mynsien wa jai-jai ymtoh dei thmu wa sih namo wow pynawri.
“I lai i da ka luti wa jai jai, neiyi i daw won wa phah ya ki pulit ha Star Cement?” Da kylli u Nidamon Shullet uwa man u President ka JHTOA.
Sa uwi tawon u dkhot (u wym kwah wow pynmih pyrtuid) da ong u wa ki paidbah neipor cheipor manda emkaam yarap ki na ki pulit, ki pulit slem ki wow poi cha ki, tangwa kammon sang smat ki pulit wow poi cha kani ka thaw (Star Cement) wei ini da pynartatien ko ya ki paidbah wa boon wa lang.
