Ka Jaiñtia National Council (JNC) da beiñ joor ko ya i klam u Symbood Montri Rangbah ka jylla, u Sniawbhalang Dhar wa ki bru na Ri-loom Jaiñtia da kyrpaad ki ya ka sorkar wow wanrah luti rel hapoh Jaiñtia Hills.
Ka seiñ da ong ko wa ini i kam u Sniawbhalang da pynphylla ko ya ki paidbah na ka thaaiñ neibhah ym em wa kwah ya kani ka luti rel wei boi ini i kam toh na ki kattu katni ngut kiwa emkti wa yajan wa kiwa mihkhmat khnang wow yoh myntoi ki samen.
Da beiñ leh yei klam u Sniawbhalang Dhar uwa da ong wa emkaam u wan ki bru na baar neibhah ka sorkar da pynbiang ko ya ki kyndon wow kdoh u khoom.
Kamtæ ka seiñ da kylli ko wa nadooh ynnu ka sorkar tipmit ko ya ki kyndon aiñ wow khang khyrdep na i wan psiah tooh ki bru chapoh jylla wei hanlada dap 3 snem tam wa wanrah ko ya ka Resolution wow dawa ILP tangwa kanti leh ym mih iyi, wei iyi wa da leh ka sorkar ya ka MRSSA kawa ympu krehkaam hadooh katni.
Da kylli ko leh ya i myntoi na ka luti rel wei neiyi i daw wym wanrah chwa yei wow myntoi ki khynnah khynroo, weileh wym e chwa ya ka Government College ha East Jaiñtia. Da kylli leh weileh wa dang sahteiñ ka Residential School, ka Teacher’s Training Centre?
Ka seiñ da kylli ko leh wa katwon tylli ki karkhana khyndawbilat wa pynmyntoi ya ki paidbah ka thaaiñ wa weileh ka sorkar ym chimkhia ko wow wanrah ya ki kyndon wow e kreh ya ki khynroo.
Khaddooh ka seiñ da e Wyrta ko deiwa che wow mylliñ noh chwa ya ka luti rel wei wow kyruiñ chwa ya i eh i khor wa chem ki paidbah, wow kyruiñ cha ki khynnah thooh kreh, ki luti syngkieñ wa da chna khalær da ki Contractor, ka Civil Hospital wa kiwi kiwi.
Discussion about this post