Haka kyrwoh wa phah daka Khasi Jaintia Christian Leaders Forum (KJCLF) hajrong iwa jia ha chnong Umoid ha ka 24 tarik uni u bnai, da ong wa pyndap ko ya waroh dei sñiawkhia wa joor bha, wei ka KJCLF da beiñ joor ko ya ini leh yong ki bru wa sih kiwa da pyndep ya ki kaam wymman yong ki ha i doom ka synyaw, kamtæ da khut ya ki bor chnong wa ki bor sorkar wow kreh chitom hawa booddien ya ini yow yoh i hok (Justice) wow synchaar.
Ka Forum da phah ko leh yei sñiawlem cha kitu kiwa chah ktah ha ini i jia wa cha kiwa ha yung yong uwa da khlaad noh. Ha i jooh i por da e leh ya i kyrchaan ya ka St. Xavier’s College wa kiwa pynlai ya ka, kiwa em i thmu wei ekti yarap wow pynku yei nang i stat ha kani ka thaaiñ, deiwa kyrmen wa ym pynkut noh ya ki kaam wa bha yong ki na ini i jia.
Ka Forum da beiñ joor ko leh ya ki jia kiwa kam kini ha ki paradoh parasnam yong i chawi chawi de wei da kyntu ya ki khynroo wa kiwa chong chnong ha ka jylla waroh wow pynyakhlaad ya idæ na kini ki bru kwah snaam wa ki kaam wymman yong ki, wei wow ya krehlang neibynta i chongsuk chong chngaaiñ ha ka jylla wa ka ri waroh kawi.
Da ong leh wa waroh ki jaitbru wa kiwa chong chnong ha ka ri, i ya kwah i ya i jooh i roi i paar wa ka chongsuk lang neibhah wa waroh i ya ksohkti lang i heiyatoh wa kiwa boon ha i im i man-ka- sngi.
