Ka Khasi Students’ Union War Jaiñtia Circle ha ka 3 tarik uni u bnai hapoh i yahkhmat u President u Laitphar Syngkrem wa u General Secretary u Lurman B Talang, deiwa emlang u Leningrad Tariang In-charge yong ka Circle wa ki dkhot yong ka seiñ da lai pait ki ya ka Residential School kawa em hapoh Pdengshakap kawa da yoh yutip toh kawa da dep chna. Tangwa ka seiñ manda poi ko ha katai ka thaw da chem ya chiboon i duna wa i kreh tangdep da u Contractor ya katai ka yung (Building).
Ha ini i lai pait da emlang leh u waheh chnong ka Pdengshakap u Forward Shylla wa u Secretary chnong u Shailang Pakyntein.
Neiliang ka seiñ da beiñ joor ko ya ini i kreh tangdep u Contractor ya kani ka Residential School kawa daw man kam kawi na ki skur wa rap heh hapoh ka thaaiñ War Jaiñtia, ka seiñ da beiñ ko leh ya ki bru sorkar kiwa lai sylli (Inspection) ya kani ka skur ha i por wa chna kiwa khlem da pynmih ya iwon iwon i pyrchah lane i ujor pyrchah ya u Contractor hajrong i rukom chna ya kani ka yung kawa dap du da ka um suda chapoh heiwa ka saad leh man ko kawa pai um la kam ka kchaaid chapoh yung.
Ka seiñ da ong ko wa daw thooh ko ki laad ki luti wow pynbor ya ka sorkar wa toh u pait ko wa kam kini ki jait Contractor kiwa kreh habra ya i kaam, kiwa kreh yaki kaam wa da ki klur tyngka tangwa da sepai noh khlem da mihsoh.
Ka seiñ da ong ko leh wa ym chong kli-kti wei daw leh ko leh da ka RTI hajrong ini i kaam. Neiliang yong u waheh chnong leh da beiñ joor u ya ini i kreh khalær u Contractor ya kani ka Residential School heiwa da pyntip u leh wa da dep ong ki ya u Contractor wow kreh bha tangwa ym ap u ya ki bor chnong wei ym ye ki wow leh iyi iyi leh.
