Ka KSU Mawkyrwat Circle da beiñ joor ko ya ki bor pulit yong ka South West Khasi Hills District hajrong i lai khynra ya ki yung wa sah ki dkhot ka KSU hapoh ka dong ka thaaiñ Mawkyrwat waroh kawi.
Ka seiñ da ong ko wa da yoh yutip ko leh wa ki pulit da psiah yabor wow khynra yaki yung ki sem yong ki dkhot iwa da man thij la kam ki dkhot kiwa kieñ suloi. Wei ini i leh ki pulit da pynhær rngu ko khamtam yaki khynnah heiwa da em leh ha ki por wa wan psiah chiteiñ miet haki yung ki kynthai deiwa muaid iwa da pyntieñ hadooh kattæ kattæ ya ki manbei wa ki khynnah.
Chooh chooh ka seiñ da kam ko leh wa da em i chah bom chah dat yow pynphla yabor yaki khynroo kiwa chah kem ha ki pulit wei da em kiwa jngem wei da em ki dak ha i doh i pran yong ki wei ini i leh kamni toh iwa man pyrchah yaka aiñ.
Ka seiñ da ong ko wa ini i leh kamni ym wanrah ko yei bha tangwa man pathan ki kamwa bær blooh ha ki kha wa mynsoo iwa daw man kamwa e diñ ya ki khynroo.
Kamtæ ka seiñ da dawa ko na ki bor pulit wow sangeh syndon ya kini ki kaam lym kamtæ ym chong paitke de ya ini.
