Ka Khasi Students Union-Lapangap Unit da beiñ ko yei klam u CEM ka JHADC uwa da pynbaad wa em ki paaid wa em ha khappood kiwa em EPIC yong Assam wa Meghalaya heiwa ya ini u CEM da ong u ynnin ka sngi ha ka Dorbar Ly’ur ka JHADC.
Neiliang u GS ka KSU Lapangap Unit, u Saikial Sumer da ong u wa ini i klam toh iwa khlem yurim wei kammon batai u ya ini hawa ym jooh em hiar u cha thaaiñ khappood chisien leh neibynta wow pait wow jngieh ya ki paaid khappood kamwa leh da ki MAC (Member of Autonomous Council) ka Karbi Anglong Autonomous Council kiwa lai hiar man-i-por cha khappood.
Da ong u leh wa u CEM ha i por wa em i kajia pood ha Psiar wa Mooluber da klam che u wa tang chi inchi leh i thaw wa haap hapoh i pait yong ka JHADC ym lai cha Assam wei ini da man kam i pynbiej paidbah wei ym yahap de ha ka juk wa da che katni, da ong u leh wa u CEM toh u pynche u ya kitæ ki chnong kiwa emkti wow baam armaloi.
Ka KSU Lapangap Unit da kylli ko ileh ya i khloo ka District Council wa em ha Khanduli da dai lilam ha kini ki snem wa da lai neibynta wow pam khloo tangwa da chah khang ha ka Assam hawa kat ka District Council ym em ko mo ya ki kot ki sla kiwa biang.
Da kylli leh wa lada kamni ym tip tikna mo iwon i khloo ka JHADC hawa ye ka Assam wow khang wei ileh ym em bor ko mo ka JHADC wow leh iyi iyi yei khang ka Assam wei iyi mut wow em ka JHADC lada ym nood ko wow leh iyi iyi leh.
Puræ leh: Da pynbiang lut ya ki kot wa emkaam ka sorkar jylla yow pynbait pood: Thombor Shiwat
