Jowai: Ka seiñ Mines, Mineral & People (MMP), ynne ka sngi da phah chithi ko cha u montri rangbah ka jylla Meghalaya yow pynsñiaw yei pyrchah yeiwa jia ya ka Agnes Kharshiing kawa da kreh wow sai pyrthai ya ki kaam baam-tooh ki sahep sorkar wow yada ya kiwa kreh neibynta ki hok ki bru.
Ka seiñ da ong ko iwa jia ya ka man i iwa pyrchah heiwa kwah u wanrah ya ka roi ka paar kawa neh slem ymtoh kawa pyrkhat ya du ynne ka sngi wei i kreh yong ka ha kini ki snem hapoh ri-loom Jaiñtia wow sai pyrthai ya i tih mooyong tooh da wanrah i ya ini wa jia wei da pynkynmoo ki leh ya iwa jia ya u Poipynhun Majaw ha uni u jooh u snem ha u Wisu (March).
Ka MMP da ong ko leh wa kam ka seiñ wa kreh ha waroh kawi ka ri wow yada yei hok ki bru wa chah ktah ha ka tih marpohkhyndaw da kyntu ko ya ka sorkar jylla wow pyntikna wa kam iwa jia ya ka Agnes ym jia de ki wei kiwa emkti wow kem noh ya ki.
Heijooh i por ka seiñ da beiñ joor ko yei kit tooh ya u mooyong hanlada da khang ka NGT iwa pynyoo wa ymem wa pait ka bor ka aiñ ya ini wei emkaam wow leh yeiwa emkaam yow im biang ka synchaar paidbah.
Ka MMP toh ka seiñ kawa krehlang wa ki bru samen, ka imlang sahlang yow yarap ya ki bru wa chah ktah ha ka tih mar pohkhyndaw wei wow pyrchah yei chah ktah ka rymaw na kini ki kaam wei katni krehkaam ko ha ki 16 tylli ki jylla hapoh ka ri wei da kreh ko leh neibynta ki kynthai, ki khynnah, ka chait ka khiah wa ya ka rymaw.
Discussion about this post