Ka Dorbar Chnong Moolamylliang da beiñ joor ko ya ki bru wa pynchna ya iwi i dur wa da chon hapoh i thaw pynriam khrik-khrak ka chnong ha u snem 2021 iwa da pteiñ hadooh ka 2 tarik uni u bnai deiwa booh lang wa iwi i dur ksuid yow pyntieñ bru.
Neiliang u Waheh Chnong, u Apmon Pachiang da ong u wa ini i dur wa da chna chynnam da ki bru wei da pynpoor ha ki Social Media toh du wow pynsih naam yei pyrtuid ka chnong wa i thmu wa bha ka chnong wow pdiang ya ka Christmas kamjooh ya u snem thymme.
Kamtæ da ong wa ini leh ki bru kamni da pynsih ko yei pyrtuid ka chnong kamjooh ya kiwa chong chnong yei kaam wa bha wa da leh ki wei da beiñ leh ya kitu kiwa emkti wow pynbood naam ya ka chnong ka thaw.
Da kyntu leh ya ki paidbah wym toh wow ngait ya ini i dur wa da chna thok da ki bru wym man.
