U Prof. Lakhon Kma uwa man u President ka North Eastern Hill University Teachers’ Association (NEHUTA), da beiñ u yei lai ki dkhot ka Voice of the People Party (VPP) wow yachem ya u Vice Chancellor ka NEHU hapyrdi i yakhih kiwa lai puræ kani ka skurbah.
Heijooh i por leh da beiñ u ya u Vice Chancellor, u Prof. Prabha Shankar Shukla u wym bna iyi iyi leh ya ka NEHU wa ya kiwa lai puræ ha ka.
Da ong u wa u VC smat u wow lai cha ka Shillong Press Club wow yaklam hadooh chiteiñ kynta, katwa hakhmat ka yung krehkaam yong oo du ar kaap leh yei ye u wow lai kylli ya ki khynnah yei long i man ki.
“Phi jooh yoh sñiaw phi wa u VC uwa paitsiar na khiandwar ya kiwa lai puræ kiwa da chong chah thngan wei u wym bna won wow kylli kammon man ki. Wa toh neidaw yong oo wa da pynman hadooh katni ya ka NEHU, uwa da rben sniehdoh sakhiat, ym tharai O wa daw ieh u ya ka chuki”, da khyrwait u Prof. Lakhon.
Da ong u wa lada u VC ym leh u iyi iyi ya ini i yakhih daw heh chooh chooh ko. “Toh i kaamram u VC wow leh iyi ræ iyi wut-wut ymtoh wow chong paitke hi-eh”, da ong u.
Hajrong i lai kiwa yahkhmat ka VPP ha ka 6 tarik uni u bnai cha NEHU, u Prof. Kma da ong u wa lada lai ki cha NEHU, toh u lai sñiawlem ki ya kiwa lai puræ ymtoh wow lai bait cha ka kamra krehkaam u VC, itæ ymtoh iwa emkaam.
“Ka NEHUSU da sñiawrem sakhiat ko hawa ki em ki hei chah thngan tangwa ki won da wan neiwon ym tip yow lai bait cha u u VC heithaw wow lai yachem ya kiwa lai puræ,” da ong u.
Da ong u du wow lai yaklam sñiawthooh, ka NEHUTA da toh u lai ko nadooh mynnu, tangwa katni ym toh de ka jooh ka phang, wei toh u sñiawthooh wow pynhun pynjemnood ya kiwa lai puræ neibhah ki chong chah thngan ki.
Discussion about this post