Kiwa yahkhmat ka Raij Namdong deilang wa 11 ngut ki waheh chnong kiwa em hapoh ka Raij Namdong da mih ki chaphrang wow beiñ joor yei leh embor ka Jaiñtia Hills Autonomous District Council ya ki kaam synchaar khadar hawa yatoh wa ka chnong Thadmynri, Raij Namdong-Elaka Nongjngi.
Ha ka khubor wa da phah da kiwa yahkhmat yong ka Raij ryngkat wa ki waheh chnong da ong wa ka Thadmynri nachwa toh ka khloo yong ka chnong Namdong wei hadien wa da chna ya ka Raij Namdong da sdang wow pynmih ya kiwi won ki chnong kiwa haap hapoh ka Raij Namdong kamtæ da sdang wow e pyrtuid ya ki chnong kiwa haap hapoh ka Raij Namdong Elaka Nongjngi kamni ha wah:
Namdong-A
Namdong-B
Myngngor
Mukoh
Umjalisiaw
Kremmyrsiang
Sase Chong Ngiah (nachwa kawa katni Thadmynri)
Ladmyngngor
Khansaro
Madanrtiang
Lumrot
Mukhnang
Kini toh ki chnong kiwa haap pura waroh hapoh ka Raij Namdong Elaka Nongjngi wei waroh ki kaam ki jaam da leh wow pyndep da ka Raij Namdong wa Elaka Nongjngi nadooh ka kaam waheh chnong, kaam jied Dolloi wa kiwi kiwi, tangwa da khyrngiat wa ha ka 07-10-20 ka JHADC da pynmih ko yei pynbna wa ka chnong Thadmynri da haap ko chapoh ka Elaka Nartiang wei ini da pynman ya ki kam ka Elaka Nongjngi ka Raij Namdong wa ki chnong wow yakhun hadooh ha Meghalaya High Court wei hajrong ini i yakhun ka JHADC da pyndam ko yei pynbna yong wow tipmit ya ka chnong Thadmynri wa haap ko cha ka Elaka Nartiang ha ka 15-12-2020 wei ha ka 16-12-20 ka Meghalaya High Court da pynmih ko ya ka hukum wa ka JHADC wow lai leh sorjamin lang (Joint Resurvey) ya ini i kaam.
Tangwa hadooh kini ki sngi neiliang ka chnong ka Raij wa ka Elaka hi waroh kawi ym em chah khut lane klem yoo ki ya ka Joint Resurvey hapyrdi ki Dolloi, kiwa chong chnong wa ka JHADC tangwa katni won ka JHADC da phah pathan ko da ki bru yong ka wow pynpsiah pyrtuid cha kani ka chnong Thadmynri Raij Namdong Elaka Nongjngi wow thap Vote Dolloi cha ka Elaka Nartiang.
Hajrong ini, da dep booh ujor nadooh ka Elaka ka Raij Namdong deilang wa ki 11 ngut ki waheh chnong, hajrong ini i dawa wa ka JHADC toh u pyndam noh chisyndon ya ini i leh bor ya ka kaam synchaar khadar kam ki bru wa da stat katkam ka juk wa da che katni.
Wei lada pynksan yeini toh u khut da ka Public Hearing neibhah kam kiwa chna aiñ da pynjæd ko ya ka aiñ synchaar u warim.
Kamtæ yow neh ka chongsuk chong saaiñ ha ki Elaka, ki Raij, ki chnong ki thaw da kyntu wow leh yeiwa hok wym toh u pynjæd pynpra ya ki chnong ki thaw.
