Ka Raij Namdong lyngba u Secretary yong ka Raij Namdong u I. Pakma da beiñ joor ki ya ka Jaiñtia Hills Autonomous District Council yei pdiang ko ya ka chnong Thadmynri wow lai cha ka Elaka Nartiang deiwa pynsakhiat du na ki le tylli ki Patta kiwa pynyoo wa ki da Register cha u Dolloi Nartiang, deiwa mylliñ won ya ki hajar tylli ki Land Holding Certificate wa Patta wa da Register cha u Dolloi Nongjngi heijooh i por wa ka chnong Thadmynri da e bor da ka chnong Namdong Elaka Nongjngi wow seiñ chnong seiñ thaw ha chnong Namdong hadien ka yakhun mukotduma pyrchah ya ka United Khasi Jaintia Autonomous District Council ha u snem 1970.
Ka mukotduma toh hajrong i chah kam i khloo wa pyrtuid Thadmynri kawa toh i khloo yong ka chnong Namdong wei ka chnong da jop ko ya kani ka mukotduma ha u snem 1973 wei hadien ini kiwa yalam ka chnong Namdong da e ki wow chong chnong nyngkong ha kani ka thaw Thadmynri da ki Nepali wei hadien i beh dkhar ka seiñ KSU, kine ki Nepali da yut no ki na kani ka thaw wei ka chnong Namdong da e laad ko ya kini ki bru na ki thaaiñ Khynriam wow chong ha kani ka khoo Thadmynri hapoh i pynlai yong ka chnong Namdong.
Kamtæ nadooh wa sdang kani ka chnong da thung ya u Waheh Chnong da u Waheh Raij Namdong wa u Dolloi ka Elaka Nongjngi, ya ki LHC/Patta da Register waroh cha Elaka Nongjngi tangwa du na ki daw wa khian wa nai kiwa ya thut hapyrdi kini ki ar chnong da pyman syndon ya ka District Council wow leh ya ini khlem da pynbait sani hachwa wow rai ya i sakhiat.
Da pynsñiaw leh yei lyngngoh wow yoo wa ka District Council da e ko ya u Wel Bareh wow pynemkaam hadooh san tylli ki Seal du hapoh soo bnai wa pynyoo yei kaam wa ksoh u kiwa man kamni ha wah:
- Rangbah Shnong Thadmynri (Wel Bareh), Elaka Nongjngi (ha u snem 2015).
- Waheh Shnong Thadmynri Elaka Nongjngi (Wel Bareh) (ha u snem 2017).
- Waheh Shnong Thadmynri (Wel Bareh) (ha ka 24th– August – 2020).
- Acting Waheh Shnong Thadmynri Elaka Nartiang (Wel Bareh) (12th– 12 – 2020).
- Acting Waheh Shnong Thadmynri (Wel Bareh) (23rd– 12 – 2021).
Hajrong ini neiliang ka Raij da ong ko wa i e laad ka Executive Committee yong ka JHADC ya uni u bru wow pynemkaam ya kini ki Seal da ktah ko ya ka imlang sahlang neidaw wa uni u bru da kini ki Seal yong oo da mynjur (Recommend) u ya ki kot ki sla ki paidbah, da e NOC wow Register thaw wot lada kani ka chnong ym em ko ki khloo yong ka hi lait noh ki kpær yong ki hapoh chnong kawa da e sñiawbha da ka chnong Namdong-A ha i por wa seiñ chnong, wei da pynsoi pyrtuid ya ki 1000 tam ki bru na ka chnong Thadmynri wow lai cha ka Elaka Nartiang nadooh kiwa dang kha, kiwa dang dep e pyrtuid hadooh kiwa da tymmen.
Kamtæ da kylli naka District Council ileh wym pynchitom ya uni u bru wei da e laad wow ksoh u boon tylli ki Seal deiwa khlem yoh Sanad naka Council wow man kam u Waheh Chnong, heiwa ya ini waroh da dep wow thoh cha u EM yong ka JHADC wei da chem sabut leh deiwa leh lyngba ka RTI.
Da pynbaad leh wa u Wel Bareh da e laad u leh ya ki bru na ka chnong yong oo wow rep saroo wei wow thang rngaw hapoh ka khloo yong ka JHADC, wei da paan yei pyrtuid kini ki bru nadooh u snem 2016 tangwa uni u bru ym em e u wei da murieh bait u yei pyrtuid ki bru wa da pynsih ya kani ka khloo wada yada namo ka Protected Forest.
Neiliang ka chnong wa ka Raij leh da booh ki yei ujor hakhmat ka Administrative Officer ka JHADC ynnin ka sngi yow pynchitom ya uni u bru wei wow pyndam leh ya ki kot ki sla NOC kiwa uni u bru da e u cha ki paidbah wow Register LHC/Patta, neibhah i thaw toh i yong ka chnong Namdong Elaka Nongjngi wei ini i leh uni u bru daw pynmih ko chiboon i kulmar ha ka chnong ka thaw.
Kamtæ ka EC yong ka JHADC ym toh u lehke ko ya ki kaam synchaar khadar, ya ki riti dustur ki chnong ki thaw khamtam ya ki chnong kiwa da rim kiwa da em ka yong ki hi ka dustur kamtæ hachwa wa ka JHADC u phiah ko ya ki chnong, toh u thooh bniah ko na waroh ki liang khnang wow im ka riti dustur, pynkut ka khubor na u I. Pakma, Secretary Raij Namdong.
