Ka Shillong Press Club (SPC) deilang waka Meghalaya Editor’s & Publishers’ Association (MEPA) da pynsñiaw ki yei beiñ ya kiwa emkti wow pynpoor ya ki khubor thok kiwa yahbkla wei ha kani ka kynti da pynemkaam bakla yei pyrtuid ka Editor ka The Shillong Times, ka Patricia Mukhim deiwa pynmih yei pyrtuid ko deilang waka seiñ saiñhima.
Ka SPC da ong ko wa katni ki bru paidbah leh da embor ki wow pynmih khubor lyngba ki Smartphone ki ha ki rynsan Social Media wei da mih iwa boon iwa bha tangwa ini won da pynjoor ko leh heijooh i por yei mih ki khubor thok.
Neiliang ka Meghalaya Editors’ and Publishers’ Association (MEPA) leh da pynsñiaw ko yei wym sñiawsuk wei khyrngiat ya kini ki bru wa chim kabu wow pynsih yei pyrtuid ki bru deiwa pynmih ya kini ki jait khubor thok.
Kini ki bru wa da chim kabu da pynpoor ki yei dur wa em ka chap ka All India Trinamool Congress heiwa da thoh yei pyrtuid ka Patricia Mukhim kam ka kyrtong ka Party na Mawlai Constituency wa i pyrtuid u Vicky Dey na South Shillong Constituency neibynta ka Election MLA 2023 ka Meghalaya.
Ka MEPA da ong ko wym poi pyrkhat ko wow jia kam ini ya kawa thoh khubor.
Kamtæ da kyntu ya ka Cyber Crime Cell yong ka Meghalaya Police wow thooh ya kiwa pynmih ya kani ka khubor thok wei wow pynchitom ya ki katkam ka aiñ khnang wa kam ini i pynemkaam bakla ya ka Social Media ym jia de i hadien habood.
Ka SPC da kyntu ko leh ya ki bor ka aiñ wow leh deiwa khor ya kini kiwa pynbood naam katkam ka aiñ lada rieh ki heiwon heiwon.
