Ka kynhun hapoh ‘Ka Sur ki Nong Mawlai’ ynne i janmiet da beiñ joor ki ya ka sorkar jylla kawa da khut hajir ya kiwa yahkhmat yow paan pynche hajrong i lum paidbah ha ki ar tylli ki yalang kiwa da pynman ha ka 25 wa 27 tarik yong u bnai wa da dep.
Ka sorkar jylla lyngba ka Deputy Commissioner yong ka East Khasi Hills da phah ko da ka chithi wow khut hajir ya kiwa yahkhmat yong ka kynhun ‘Ka Sur ki Nong Mawlai’ kawa da em hadooh 11 tylli ki seiñ kiwa da ya ksohkti lang.
U Donboklang Kharlyngdoh da ong u wa neiliang kiwa yahkhmat katai ka kynhun da pynsñiaw ki ya i khyrngiat wow yoh pdiang ya katai ka chithi, neibhah i yakhih yong ka ‘Ka Sur ki Nong Mawlai’ toh neibynta wow yoh bichaar hok ya ka yung ka sem u C. Thangkhiew wei kamjooh leh neibynta ka mynried wa bha kiwa mandien.
Da ong u wa i mih paidbah ha ka 25 tarik u Naisaphra ym toh wow pynbor, heiwa ki manbei manpa wa ki khynroo da mih hi khlem tieñ de ya ki kyndon wa da booh da ka sorkar neibhah ki sñiawthooh ki wa da toh i por wa emkaam wow mih paidbah. Da kyntu u leh ya ka sorkar wow pyndam kreh chipor ya ki pulit wa emkti ha itai i jia ha ka 13 tarik u Naisaphra, wei da ong chooh chooh u wa ka sorkar MDA kawa chim ko ya thong Divide and Rule Policy.
U Donbok da ong u wa ka kynhun ka tylli wei man ryntih wei lada hap maad yei eh leh, waroh daw maad lang ki wei daw pteiñ wow yaleh.
Neiliang u Marbud Dkhar da ong u wa ka sorkar toh u pynsmat ko ya ka Judicial Enquiry neibhah hadooh katni ka kynhun da yoh yutip wa katai ka takit ym pu em sdang, deiwa pynrap wa lada ka sorkar dang pynslem næ pynthut yei takit, neiliang yong ‘Ka Sur ki Nong Mawlai’ ym chong ngiah ki wei daw pynjoor yei yakhih.
I chah khut hajir kiwa yahkhmat ‘Ka Sur ki Nong Mawlai’ toh yow pynche yei tyngkheiñ kyndon yada COVID-19 ha ka 25 wa 27 tarik u bnai wa da dep, neibhah wa da em i lum paidbah ha Mawlai kawa da palat hajar ngut.
Neiliang u Marbud da pynbaad u leh wa ya ki yalang wa da pynman da kiwa yahkhmat ki seiñ saiñpyrthai nadooh ka Election MDC ha Garo Hills wa da mih da ki phaw hajar ngut ki paidbah ha ki yalang yong u Montri Rangbah, i wan yong u Union Home Minister, u Amit Shah ha ki bnai wa da dep wa ym em itæ i bood kyndon, kawa pynyoo wa du neibynta i yoh nong ki heh ki haaiñ ym em COVID wei ka kynhun ym ye ko wow pdiang wa ya ka aiñ neibynta ki heh ki haaiñ u em da ka yong ki hi katwa neibynta kiwa khian wa nai da em da kawi.
Neiliang u Samuel Biam uwa man u President ka SSMP, da ong u wa i pynpoi ya kani ka chithi dang pynktik ko ya ki nong Mawlai, wei i mih paidbah ha kitu ki sngi wa lai cha ka yakhih toh neidaw wa kthang nei leh yong ka sorkar, wei ym toh de wow jia kam itu i jia hadien habood.
