Hadien wa chah pynmynsoo kiwa kitkaam chnong ka Dorbar Chnong Tuber Kmai Chnong wa em ha East Jaiñtia Hills, neiliang ka Synjuk Waheh Chnong Ri Jaiñtia (SWCRJ) da sñiawkhia wei sñiawsih mynsien ko hawa em i jia kam ini hapoh ki chnong ki thaw.
Ka synjuk da ong ko wa man iwa khuslai wa wot ya kiwa kitkaam chnong leh ym em de i chongsuk chong chngsaaiñ, neibhah katkam wa mih ha ki khubor wa ha i miet 3 tarik heipor 11:30 da em i kulmar yachoh hapoh ka chnong Tuber Kmai Chnong wei hawa pyrchang wow pynsuk pynsñiawthooh ya kiwa pynkulmar, u waheh chnong wa uwi uwa kitkaam chnong da chah pynmynsoo ki deiwa em uwa pynemkaam da u sdai.
Chooh chooh da ong ko wa iwa sam sñiawsih toh wa uwa pynmynsoo ya ki toh uwa chong chnong hi wei man u leh kam uwa kitkaam ka JNC (Jaiñtia National Council Central Body).
Ka synjuk da ong ko wa embhah wa em u Blai uwa da yada ya ki nei mynsoo wa joor wa nei yap.
Kamtæ ka synjuk da beiñ joor ko ya kam kini kiwa ymtip de u burom ya kiwa kitkaam chnong, hanlada em i chrai tangwa ymtoh u chim ki yaka aiñ ha kti wow leh pyrchah deiwa pynemkaam ya ki tiar pynmynsoo.
Neiliang ka synjuk da beiñ ko ya ini i leh uni u bru uwa man leh uwa kitkaam ka JNC deiwa kyrpaad ya ki bor ka aiñ wow chimkhia u pynchitom ya uni u bru deiwa khor.
Heijooh i por da kyntu ya ki waheh chong wa kiwa chong chnong ka Ri loom Jaiñtia waroh wow man kiwa yatylli, i sñiawthooh mar kylliang wow lait u chah yooh ha ki bru chi sngi wa ha ki baar ri.
Discussion about this post