Ka Thma U Rangli Juki (JUR) da beiñ joor ko hajrong i chah dat ki ar ngut ki khynroo wa dang lai puræ ha ka skurbah Central University Kerala iwa da jia ha ki thaaiñ lad Robert Hospital ha Jaїaw, Shillong ha ka 24 tarik uni u bnai kamjooh leh kiwi de kiwa da jia ha kini ki kajiak sngi.
Ini i chah dat wa khlem daw wa khlem yurim ya ki bru kiwa lui lui kiwa na baar ka jylla wa kiwa napoh ka jylla ya ki wym toh Khasi nadooh kiwa mylla sngi, kiwa dai dawai cha ki Hospital, kiwa mylla wa pynpoi tiar wa pynpoi baam cha yung ki bru ha ki kattu katni ki chnong yong ka nongbah Shillong da joor bha ha kini ki sngi.
Ka TUR da ong ko wa kiwa boon kam ini wa jia, ki paidbah ym tip ki neibhah wym em wa nood wow khana wei wot ka chnat pulit leh da suki hi-eh ki wei ym em kitkhia ki wow booddien, u takit, wow kem wei pynchitom ya ki damok wa emkti ha kam kini ki kaam pyntieñ bru wa kiwa pynbood naam ya ki chnong ki thaw, ya ka imlang sahlang wa ya ka jylla.
Da ong leh wa lada pynksan wa i yachoh yadat wa i pynmynsoo bru toh ka luti wow yada ya ka ri wa ka jaitbru da man i sñiawthooh bakla wa i hikai wa bakla tam.
Heijooh i por ka TUR da ong ko wa i toh ki jaitbru wa khian paaid wa ka jylla kawa khian paaid wei em i chiboon i eh kiwa hap i wow yakhun pyrchah nadooh i duna kreh, i hiar ka rep ka riang, ka khayi pateiñ, i yoh i kot, i dooh ya ki khloo ki um ki wah hadooh i duna i sumaar ya kiwa kjut wa chitom wa kamtæ ter ter.
Chooh chooh da ong wa hao em i tieñ wa ka jylla wa ki jaitbru khian ka Ynñiawtrep wa ki A’chik yong ka jylla ye ki wow chah tlep, wa ye ki u dooh yei kheiñ kur kheiñ jait, i ktien wa i khyndaw. Tangwa ini waroh ym ye i wow pynksan wa kiwi kiwa wan hapoh ka jylla toh kiwa wan hiar thma ya i wei wow dat u bom ki lada chem cha luti syngkieñ. Tangwa em ki aiñ kiwa i ye i wow chna lyngba kiwa mihkhmat ka yung dorbar chna aiñ kam ka Benami Act, ka Land transfer Act wa ka Sixth Schedule kiwa ye wow pynbait yei psiah i mih wei wow yada ya i.
