Ka Thma u Rangli Juki (TUR) da beiñ joor ko hajrong i leh dusmon yong ki damok kiwa da tympra ya u motdur yong ka Blai Kali ha Mawbah. Deiwa ong wa kam kini ki damok ym toh wow pdiang ha ka imlang sahlang wei toh u beiñ joor.
Ka TUR da dawa ko wow takit wei wow kem wei pynchitom ya kiwa emkti.
Ha ka kyrwoh wa phah da ka TUR, da ong wa man iwa sñiawkhia wa chah pynsih, chah leh dusmon u motdur ka Blai Kali wa em ha Kali Mandir Bhoothnath Mawbah, Shillong iwa da jia ha kini ki por wa ki kynhun niam wa khian paaid da chah lehbeiñ chah thombor i ngait yong ki da ki niam heh paaid.
Da ong wa ha i por lehkmen Christmas da em i chah pyndik deiwa chah pynsangeh ya ka ki FCRA Account yong ki seiñ wa khian paaid niam kam ka Missionaries of Charity wa seiñ da ka Mother Theresa, neitæ i chah maham tynyap ki kynhun jaitbru kiwa ngait ha ka niam Muslim ha kiwa yahkhmat chongchit niam Hindu wa kiwi kiwi ki kaam pyntieñ dang roi ki.
Chooh chooh da ong wa ha ri india waroh kawi da sakhi yei ku i chah ban beiñ ki khian paaid wei ki bru da suki ki wei ym em leh kiwa yieñ wow yachah ya ki khian paaid wa ya kiwa chah ban beiñ.
Ka TUR da beiñ joor ko ya iwon iwon i lehbeiñ wei chah thombor ki khian paaid wa kiwa tlotbor da ki jaitbru kiwa heh paaid la ha kiwon kiwon ki thaaiñ yong ka ri India næ ha jylla Meghalaya.
Kamtæ da ong wa man iwa kongsan wa kiwa chong chnong ka jylla Meghalaya u yieñ pyrchah wei kyntait ya ki kaam pyntieñ wa ki kaam dusmon.
“I toh u yieñ wow yada ya ki khian paaid kiwa em ha ka jylla wym toh u tieñ wei toh u yoh ki wow mane Blai laitlooid wei im laitlood katkam ka riti synchaar wei i toh u pynskem i yei chong chngaaiñ yong waroh,” pynkut ka kyrwoh.
Puræ leh: Chah pynsih i dur Blai Kali wa em ha ka Mandir ha Mawbah
