Ka TUR da beiñ joor ko yei chah tynyap u Cherishsterfield Thangkhiew ha ki pulit ynne i step synyaw pyn hapoh i yung wa sah u.
Ka TUR da ong ko wa ym pdiang ya kiwon kiwon ki kaam pynyap, ki kaam pynmynsoo wa i joo umsnam lada toh iwa leh da ki chnat wa ki bor ka sorkar jylla næ da kiwi won ki wym toh ki bor sorkar. Deiwa wa ong wa ki kaam pyntieñ wa ki kaam umsnam ki pynsih pynjæd ki ya ka imlang sahlang hi waroh kawi wei wanrah ko yei chongsier ya waroh.
Ka aiñ toh u man ko kawa ryntih wei kawa krehkaam kamjooh ya waroh nadooh kiwa chong chnong wei khamtam dooh ka sorkar ka wym toh u pynkheiñ ya ki aiñ. Kam kini ki kaam pyntieñ wa ki kaam pynyap bru wanrah wei pynmih ki ya ka kynrum kynram wa i kulmar hapoh ka jylla wei khamtam ha ka nongbah. Kamtæ ka TUR da kyntu wei kyrpaad ko ya ki paidbah wow paitngor wym toh u chah rong ha ki bor kiwa thmu wow pynkylla madan thma ya ka jylla du neibynta i myntoi samen ki kattu katni ngut.
Ka TUR u yieñ pyrchah ko ya ki aiñ kiwa pyndooh noh ya i hok longbru manbru kam ka AFSPA, MMPO wa UAPA wei da dawa wow pyndam noh chi syndon ya kini ki aiñ. Da kyntu leh ya ki paidbah wow yieñ skem wow yada ya ki hok longbru manbru.
Ka TUR ka dawa ko leh wow thung smat ya ka kynhun takit kawa laitlooid hajrong i chah pynyap u Cherishsterfield Thangkhiew ka wow khlieh da uwa bichaar ka High Court.
