Shillong: Ka United Democratic Party (UDP) ynne ka sngi da pynman ko ya ka Rally ha madan Malki heiwa da wan sakhi da ki hajar ngut kiwa kyrchaan ya ka Party na kylleiñ ka jylla.
34 ngut ki kyrtong da pynkhreh ki wow yakhun Election wei da pyntipmit paidbah ya ki da u President ka Party u Dr. Donkupar Roy.
Da ong u wa na kini 34 ngut, 7 ngut toh ki MLA wei da yooluti wa waroh 7 ngut u jop biang ki.
Neiliang u General Secretary ka Party kamjooh uwa man leh kam u kyrtong na Nongthymmai Constituency, u Jemino Mawthoh da ong u wa ka sorkar jylla ha ki 6-7 snem ym em leh ko iyi iyi leh wow pynku ya ka jylla wei u pait iyi won wow jia ha kini ki 5 snem wow wan.
“Kiwi ki jylla kam ka Sikkim wa Tripura da tam ki ya ka jylla Meghalaya iwa pynyoo wa da rem ka Meghalaya heiwa da em kiwa mahajon khlem kreh, kiwa yoh yei kyrchaan ka aiñ khlem ka yurim,” da pteiñ u.
U Paul Lyngdoh won da ong u wa chwa wow dap ka jylla 50 snem emkaam wow knieh ya i bor synchaar na ki party ka ri (National Party) wei emkaam u poi ko cha ki seiñ saiñ hima ri-loom.
Da kylli u wa neiyi i daw wa haap yang bait yei bor na Delhi chwa wow leh iwon iwan hapoh ka jylla?
Da ong u leh wa ka Congress man ko kam i kjut Baamlarah (Cancer) wei man ko ka sorkar wa kom dooh na waroh.
U Bindo Lanong won da beiñ joor u ya ka BJP kawa pyrchah ya ki Christan kamwa da yoo ha Madhya Pradesh wa Uttar Pradesh.
U Ardent M. Basaiawmoit won da kdaw kti u ya ka National People’s Party (NPP), deiwa ong “Nga kylli O ya ki paaid ka Ri-loom Garo chaphang ka NPP wei da ong ki wa ym ye u chaniah ya ka neibhah man ko ka lok ka BJP.”
Da beiñ u leh ya ki MLA Congress kiwa mih na ka heiwa heithaw wow kyrchaan ki ya ka No-Confidence Motion pyrchah ya ka sorkar tangwa da jied pathan ki wow ieh noh ya ka Party chwa ka Election.
U Basaiawmoit da sai u leh ya kawi ka Video heiwa u Prestone Tynsong uwa da psiah cha ka NPP da kop u ya u Dr. Mukul Sangma kam uwa yah khmat wa chirkhei bha.
Discussion about this post