Ka seiñ ki laad pathai khubor na Garo Hills wa tip kam ka Garo Hills Press and Media Association (GHMPA), da beiñ ki yeiwa muchlia ki bor District ka South Garo Hills deiwa phah wan hajir ya uwi u YouTuber uwa tip kam u Tatu R. Marak yeiwa pynmih khubor u hajrong i chlai um iwa dang dep jia ini wa dep hapoh ka District.
Ya ka hukum phah hajir da pynmih da u BDO ka Chokpot C&RD Block pyrchah ya u Tatu R Marak uwa pynlai ya ka NEIGNews YouTube Channel uwa da lai wow yaklam wa kitu kiwa chah ktah nei chlai um kiwa da kam wym em yoh yarap ki na ka sorkar wot hadien 3 sngi wa jia.
Tangwa kini ki bru won hadien wa lai yachem ki bor District yow kylli yeini, da kylla ktien won ki deiwi, wei kani ka khubor wa klam ki wym em yoh yarap ki da poor bha ko.
Neiliang u President wa u Secretary ka GHMPA da beiñ ki yeini wa luchia ki bor sorkar pyrchah yei laitlooid ki bru wow ong yeiwa kwah ki u pynsñiaw heiyatoh wa iwa ban wa chon ha ki nadooh i chah thombor i chah thok chukor ki wa kiwi de.
Ka GHMPA da ong ko wa ki laad pathai khubor toh u chrot wa u budloom ka synchaar paidbah tangwa ini i pynthut yei lai pynmih khubor da ki bor District man ko pyrchah yei hok ki laad pathai khubor wow leh yei kaam ki deiwa khooid wei ya ini toh u beiñ wei toh u leh smat yeiwa emkaam yow lait biang u jia kamni.
Discussion about this post