Jowai: Ki le tylli ki seiñ kiwa khayi ha ri-loom Jaiñtia kiwa kynthup yaka Lumshnong Quarry and Raw Materials Suppliers’ Association (LQRMSA), Ka East Jaiñtia Hills Drivers’ Association (EJHDA) waka All Jaiñtia Cement and Clinker Transporter’s Association (AJCCTA) da pynsñiaw ki yei pyrchah wei da beiñ joor ki hajrong i khrong dan pyrchah yaka aiñ ka sorkar jylla ha i pyrtuid ka GST ha kawi pa kawi ka Weighbridge kiwa em ha tymbud u sarok bah.
Ka sorkar jylla da pynmih ko yaka hukum wa nadooh ka 18 tarik u Wisu (March) 2020 wow phah ya ki Inspector ka Taxation Department wow em ki ha man ki Weighbridge wei kini ki bru yong ka sorkar da khrong poisa ki pyrchah yaka aiñ na ki truck kitmar kiwa kynthup ya kitu kiwa kit marbaam mardih.
U President ka AJCCTA, u Balen Thubru da pyntip u wa ini i khrong poisa kitai ki sahep sorkar pynyoo che wa man ko pyrchah yaka aiñ neibhah ha i chim poisa ym em e kiwon kiwon ki slip næ ka receipt.
“Da chim nadooh T. 300, T. 500 hadooh T. 1000 kawi kawi ka truck ha man ka Weighbridge kiwa em ha Lumshnong, Sunapur Umtyr-a wa hadooh Byrnihat,” da pyntip u Thubru.
“Kawa pynlyngngoh chooh chooh ya i, toh wa katai ka hukum wa pynmih nadooh u Wisu, 2020 wei ha kini ki bnai wa da dep ki bru yong ka Tax ym jooh khrong poisa ki wot lada hiar ki wow sylli ya i kit i bah yong ki truck, tangwa katni won ka sorkar da phah chong syndon ko yaki bru yong ka ha ki Weighbridge wow khrong poisa na waroh ki truck,” da pynrap utai uwa yahkhmat.
Hajrong ini, kitai ki le seiñ da lai yachem ki ya u Superintendent yong ka Taxation Department kawa em ha Khliehriat wow paan pynche tangwa utai u heh ha kani ka District ym ye u wow e yei pynche ya ki dkhot wa ya kiwa yahkhmat kitai ki le seiñ.
Kamtæ, wot hapyrdi kani ka Lockdown neiliang kitai ki le seiñ ym yohsa wow chim yaka rai wow khut noh da ka General Meeting wow yoh ya phyllu yumut hajrong i eh wei wow chim leh ya ki rai wow yieñ pyrchah hajrong ini i chah ktah i jakpoh yong kiwa khayi wa kynthup ya ki tre truck.
Ya kani ka yalang da rai wow pynman haka 01-06-2020 ha Rajasthan Hotel Ynñiaw Mer ha i por 11:00 waje i step.
Discussion about this post